دودھ گنگا ندی سے دوغیر مقامی بچوں کی لاشیں بر آمد

سرینگر//
سرینگر کے صنعت نگر علاقے میں اتوار کی شام دودھ گنگا ندی سے دو غیر مقامی کمسن بچوں کی لاشیں بر آمد کی گئیں۔
پولیس ذرائع نے بتایا کہ صنعت نگر علاقے میں کھلونے بیچنے والے دو غیر مقامی بچے ۱۲؍اکتوبر کو لاپتہ ہوئے جس کے بارے میں صدر پولیس اسٹیشن میں ایک رپورٹ درج کی گئی۔
ذرائع نے کہا کہ پولیس اور بچوں کے والدین نے لاپتہ بچوں کی تلاش شروع کی اور اس دوران اتوار کی شام دونوں کی لاشیں دودھ گنگا ندی سے بر آمد کی گئیں۔
متوفین کی شناخت۷سالہ شریکا اور۶سالہ منگلا ساکنان بریلی اتر پردیش کے طور پر ہوئی ہے ۔ان کا کہنا تھا کہ لاشوں کو طبی و قانونی لوازمات کی ادائیگی کے لئے پولیس ہسپتال منتقل کیا گیا ہے ۔
دریں اثنا پولیس نے اس ضمن میں بچوں کی موت واقع ہونے کی وجوہات معلوم کرنے کیلئے تحقیقات شروع کی ہیں۔