بی جے پی کے سرنکوٹ میں امیدوارمشتاق بخاری انتقال

جموں//
سابق وزیر اور بی جے پی کے سرنکوٹ اسمبلی حلقے کے امید وار مشتاق احمد بخاری بدھ کی صبح پونچھ میں واقع اپنی رہائش گاہ پر انتقال کر گئے ۔وہ ۷۵برس کے تھے۔
ذرائع کے مطابق مشتاق بخاری کی طبیعت کچھ وقت سے ٹھیک نہیں تھی اور بدھ کی صبح وہ اپنی رہائش گاہ پر بے ہوش ہوگئے اور غالباً حرکت قلب بند ہونے کے باعث انتقال کر گئے ۔
مشتاق بخاری جموں خطہ کے درج فہرست قبائل کے ایک مخصوص حلقہ سرنکوٹ سے بی جے پی کے امید وار تھے ۔ اس نشست کی پولنگ ۲۵ستمبر کو ہوئی۔
دوبار وزیر رہنے والے مشتاق بخاری نے چار دہائیوں کی رفاقت کے بعد نیشنل کانفرنس سے ناطہ توڑ کر سال رواں کے ماہ فروری میں بی جے پی میں شمولیت اختیار کی تھی۔
دریں اثنا جموں و کشمیر کے لیفٹیننٹ گورنر منوج سنہا، سابق وزرائے اعلیٰ عمر عبداللہ، محبوبہ مفتی اور بی جے پی جموں و کشمیر یونٹ کے صدر رویندر رینہ نے مشتاق بخاری کے انتقال پر گہرے رنج و غم کا اظہار کیا ہے ۔
منوج سنہا نے ’ایکس‘پر اپنے ایک پوسٹ میں کہا’’ممتاز پہاڑی لیڈر شری مشتاق احمد بخاری کے انتقال کی خبر سن کر گہرا رنج ہوا‘‘۔انہوں نے’’انہیں لوگوں کی فلاح و بہبود اور معاشرے کے کمزور طبقات کی بہتری کے لیے ان کی وابستگی کے تئیں ہمیشہ یاد رکھا جائے گا‘‘۔
نیشنل کانفرنس کے نائب صدر اور سابق وزیر اعلیٰ عمر عبداللہ نے کہا’’سینئر بی جے پی لیڈر مشتاق بخاری کے آج صبح انتقال کرنے کی خبر سن کر صدمہ ہوا‘‘۔انہوں نے کہا’’مشتاق بخاری کی موت ان کی پارٹی اور پہاڑی لوگوں جن کے کاز کیلئے وہ لڑتے تھے ، کیلئے ایک بہت بڑا نقصان ہے ‘‘۔
عمر عبداللہ نے پسماندگان کے ساتھ تعزیت کا اظہار کیا۔
پی ڈی پی صدر اور سابق وزیر اعلیٰ محبوبہ مفتی نے ‘ایکس’ پر اپنے پوسٹ میں کہا’’سید مشتاق بخاری صاحب کے موت کی خبر سن کر بہت دکھ ہوا‘‘۔انہوں نے دعا کی’’خدا مرحوم کو جنت نصیب فرمائے اور پسماندگان کو یہ صدمہ برداشت کرنے کی ہمت عطا فرمائے ‘‘۔
بی جے پی جموں وکشمیر یونٹ کے صدر رویندر رینہ نے کہا’’سیاسی لیڈر اور بی جے پی کے سرنکوٹ اسمبلی حلقے کے امید وار سید مشتاق بخاری صاحب کے انتقال کی خبر سن کر گہرا صدمہ ہوا‘‘۔انہوں نے کہا’’یہ راجوری اور پونچھ اضلاع میں سماج کا ایک نا قابل تلافی نقصان ہے ‘ میں پسماندگان کے ساتھ تعزیت کرتا ہوں۔‘‘