اقتدار کی خاطر نیشنل کانفرنس بی جے پی کے ساتھ بھی سرکار بنا سکتی ہے :انجینئر رشید

سرینگر//
عوامی اتحاد پارٹی کے سربراہ ‘انجینئر رشید نے کہا ہے کہ نیشنل کانفرنس اقتدار کی بھوکی ہے اور وہ بی جے پی کے ساتھ سرکار بنانے سے بھی گریز نہیں کریگی۔
ان باتوں کا اظہار انجینئر رشیدنے اپنا ووٹ کا سٹ کرنے کے بعد نامہ نگاروں سے بات چیت کے دوران کیا۔
رکن پارلیمنٹ نے کہاکہ جموں وکشمیر کے لوگوں کے لئے آج ایک اہم دن ہے کیونکہ ووٹنگ عمل سے ہی بدلاو لایا جاسکتا ہے ۔
انجینئر رشید نے کہا کہ لوگوں کو اگر مصیبتوں سے نجات چاہئے تو انہیں سوچ سمجھ کر اپنے ووٹ کا استعمال کرنا چاہئے ۔
عوامی اتحاد پارٹی کے سربراہ نے کہاکہ اگر بی جے پی اور عمر عبداللہ کو لگا کہ انجینئر رشید کو زیادہ سیٹیں ملیں گی تو نیشنل کانفرنس بی جے پی کے ساتھ سرکار بنانے سے بھی گریز نہیں کرئے گی کیونکہ این سی اقتدار کی بھوکی ہے ۔
انجینئررشید نے کہا کہ جس طرح سے محبوبہ مفتی نے بی جے پی کے ساتھ ہاتھ ملا کر کشمیریوں کو مصیبتوں میں ڈالا اسی طرح نیشنل کانفرنس بھی قتدار کیلئے کسی بھی حد تک جاسکتی ہے ۔
ان کا مزید کہنا تھا کہ نیا کشمیر یہاں کے لوگوں کی شرائط پر بنے گا لیکن اس کے لئے لوگوں کو بدلاو کے حق میں اپنا ووٹ استعمال کرنا چاہئے ۔
غیر ملکی سفیروں کی دوسرے مرحلے پر سری نگر آمد کے بارے میں پوچھے گئے سوال کے جواب میں انجینئر رشید نے کہاکہ ہم چاہتے ہیں کہ پوری دنیا کے لوگ یہاں آکر دیکھیں کہ کشمیر میں کیا ہور ہا ہے ۔
ممبر پارلیمان نے کہا’’کشمیر کے لوگ امن چاہتے ہیں لیکن ہمیں ان لوگوں کی بھی بات کرنی چاہئے جو جیلوں میں اس وقت مقید ہیں جن میں ہماری بہنیں بھی شامل ہیں‘‘۔
عوامی اتحاد پارٹی کے سربراہ کے مطابق اگرسچ بولنا جرم ہے تو میں یہ جرم بار بار کرتا رہوں گا۔