کولگام جھرپ میں ۲ ملی ٹنٹ ہلاک ‘۴ فوجی زخمی

سرینگر//
جموں کشمیر کے ضلع کولگام میں ہفتہ کے روز سیکورٹی فورسز نے فائرنگ کرکے دوملی ٹنٹوںکو ہلاک کر دیا۔
اس سے قبل ابتدائی فائرنگ کے تبادلے میں چار فوجی جوان اور ایک پولیس افسر زخمی ہو گئے تھے۔
آدیگام دیوسر کولگام میں صبح سویرے اس وقت فائرنگ کا تبادلہ ہوا جب مشترکہ فورسز علاقے میں ملی ٹنٹوں کی موجودگی کی اطلاع ملنے کے بعد محاصرے اور تلاشی کی کارروائی کر رہی تھیں۔
جنوبی کشمیر کے ڈپٹی انسپکٹر جنرل جاوید احمد مٹو نے بتایا کہ کولگام میں مشترکہ فورسز کی جانب سے سرچ آپریشن شروع کیے جانے کے بعد علاقے میں فائرنگ شروع ہوگئی اور چھپے ہوئے ملی ٹنٹوں نے سکیورٹی فورسز پر فائرنگ کی۔
مٹو نے کہا کہ شناخت ڈی این اے ٹیسٹ کے بعد کی جائے گی، لیکن پولیس کے پاس ٹی آر ایف کے دو ملی ٹنٹوں کی موجودگی کے بارے میں معلومات تھیں۔۲۰۲۰میں ملی ٹنٹوں کی صفوں میں شامل ہونے والے عمیس احمد وانی اور عاقب گوجری، جو ۲۰۲۲ سے سرگرم تھے۔
ڈی آئی جی نے کہا’’یہ دونوں کئی مقدمات میں مطلوب تھے‘‘۔انہوں نے مزید کہا کہ وہ نوجوانوں کی حوصلہ افزائی کر رہے تھے اور یہ قتل سیکورٹی فورسز کے لئے ایک بڑی کامیابی ہے۔
سرکاری ذرائع نے بتایا کہ انکاؤنٹر میں فوج کے چار جوان اور ایک ایڈیشنل سپرنٹنڈنٹ آف پولیس (اے ایس پی) زخمی ہوئے۔ زخمیوں کو فوری طور پر طبی مرکز منتقل کردیا گیا ہے اور تمام زخمیوں کی حالت مستحکم بتائی جاتی ہے۔
ادھرجموں کے کٹھوعہ ضلع کے ایک دور افتادہ گاؤں میں ہفتہ کی شام سیکورٹی فورسز اور ملی ٹنٹوں کے درمیان تصادم کے دوران جموں و کشمیر پولیس کا ایک ہیڈ کانسٹیبل ہلاک اور ایک اسسٹنٹ سب انسپکٹر زخمی ہوگیا۔
عہدیداروں نے بتایا کہ بلاور تحصیل کے کوگ منڈلی گاؤں میں انکاؤنٹر شام تقریبا ساڑھے پانچ بجے شروع ہوا جب سیکورٹی فورسز نے ایک گھر کے اندر ملی ٹنٹوں کے ایک گروپ کی موجودگی کی اطلاع ملنے کے بعد مشترکہ محاصرے اور تلاشی مہم شروع کی۔
عہدیداروں نے بتایا کہ ابتدائی طور پر فائرنگ تھوڑی دیر تک جاری رہی لیکن بعد میں دونوں فریقوں کے درمیان بھاری فائرنگ کا تبادلہ ہوا۔
عہدیداروں نے بتایا کہ فائرنگ کے تبادلے میں ایک پولیس ہیڈ کانسٹیبل ہلاک اور اسسٹنٹ سب انسپکٹر زخمی ہوگئے۔ عہدیداروں نے بتایا کہ آخری اطلاعات ملنے تک فائرنگ جاری تھی اور اب تک ایک پولیس اہلکار زخمی ہوا ہے۔
قبل ازیں ایک پولیس افسر نے کہا تھا کہ ملی ٹنٹوں کی موجودگی کے بارے میں مخصوص انٹیلی جنس کی بنیاد پر ایک مشترکہ سرچ آپریشن شروع کیا گیا تھا۔