محمد شفیع پنڈت کا انتقال‘ وزیر اعظم کی اہل خانہ کے ساتھ تعزیت

سرینگر//
وادی کشمیر سے تعلق رکھنے والے پہلے مسلمان انڈین ایڈمنسٹریٹو سروس (ائی اے ایس) افسر اور سابق جموں وکشمیر پبلک سروسز کمیشن (جے کے پی ایس سی) چیئرمین محمد شفیع پنڈت جمعرات کو انتقال کر گئے ۔ وہ۸۰برس کے تھے ۔خاندانی ذرائع نے بتایا کہ محمد شفیع پنڈت گذشتہ ایک ماہ سے دلی کے ایک ہسپتال میں زیر علاج تھے ۔
سری نگر کے سابق مئیر جنید متو نے’ایکس‘پر ایک پوسٹ میں کہا’’میرے پیارے چچا،جے کے پی ایس سی کے سابق چیئرمین اور جموں وکشمیر کے سابق ایڈنشنل چیف سکریٹری محمد شفیع پنڈت صاحب کا طویل علالت کے بعد دلی میں انتقال ہوگیا‘‘۔
متو نے کہا’’ان کی میت آج سرینگر پہنچے گی‘‘۔
خاندانی ذرائع کے مطابق ان کی تجہیز و تکفین آج ہی انجام دی جائے گی۔
پنڈت۱۹۶۹میں سول سروسز کے امتحانات میں کوالیفائی کرنے والے کشمیر کے پہلے مسلمان تھے ۔
بیوروکریٹک حلقوں میں انہیں ایک ایسے چیف سکریٹری کی حیثیت سے دیکھا جاتا تھا جیسا جموں وکشمیر نے قبل ازیں کبھی نہیں دیکھا تھا۔نوکری سے فراغت کے بعد نرم گفتار شخصیت کے مالک محمد شفیع پنڈت کشمیر میں کئی سول سوسائٹی اور خدمت خلق کے کاموں میں مصروف تھے ۔
دریں اثنا ان کے انتقال پر وزیر اعظم نریندر مودی اور مختلف شعبہ ہائے حیات سے تعلق رکھنے والی شخصیات نے گہرے رنج کا اظہار کرتے ہوئے ان کی موت کو ایک نا قابل تلافی نقصان سے تعبیر کیا ہے ۔
وزیر اعظم نے جمعرات کو سری نگر میں ایک عوامی ریلی سے خطاب کے دوران کہا’’مجھے اطلاع ملی کہ کشمیر کے پہلے آئی اے ایس افسر محمد شفیع پنڈت کا گذشتہ شب انتقال ہوا ہے ‘‘۔
مودی نے کہا’’ریٹائر منٹ کے بعد بھی وہ معاشرے کی بہبودی کے لئے کام کرتے تھے ‘‘۔ان کا کہنا تھا’’مصیبت کی اس گھڑی میں ہمارے خیالات اور دعائیں مرحوم کے پسماندگان کے ساتھ ہیں‘‘۔
سینئر کانگریس لیڈر جے رام رمیش نے ان کے انتقال پر اظہار افسوس کرتے ہوئے کہا’’میرے دیرینہ دوست محمد شفیع پنڈت کا انتقال ہوا۔ وہ۱۹۶۹بیچ کے آئی اے ایس افسر تھے جو جموں وکشمیر اور مرکز میں بھی کلیدی عہدوں پر فائز رہے ‘‘۔
رمیش نے’ایکس‘پر اپنے پوسٹ میں کہا’’ریٹائر منٹ کے بعد انہوں نے عوامی خدمت کیلئے اپنے آپ کو وقف کیا ہوا تھا‘‘۔ان کا مزید کہنا تھا’’نرم گفتاراور فطری لحاظ سے انتہائی نرم مزاج شخصیت کے مالک پنڈت جموں وکشمیر کے شاندار جامع ورثے کی علامت تھے اور وہ وادی کے نوجوانوں کے لئے ایک رول ماڈل تھے ‘‘۔
جواہر لعل یونیورسٹی کے سکول آف انٹرنیشنل سٹیڈیز کے ڈین اور پروفیسر امتیابھ متو نے کہا کہ محمد شفیع پنڈت ایک ممتاز سول سرونٹ تھے ۔انہوں نے پنڈت کو ایک اصلی خاندانی اور ایک شریف النفس شخصیت قرار دیا۔
ضلع مجسٹریٹ کولگام اطہر عامر خان نے کہا’’میں ان کے ساتھ گذشتہ۹برسوں سے رابطے میں تھا وہ ایک انتہائی منکسر المزاج اور سخی شخصیت کے مالک تھے ۔‘‘