وزیر اعظم کا دورہ امن اور ترقی کیلئے سنگ میل ثابت ہوگا: چگ

سرینگر//
بی جے پی کے جنرل سکریٹری ‘ترون چگ کا کہنا ہے کہ وزیر اعظم نریندر مودی کا کشمیر دورہ امن اور ترقی کے لئے ایک سنگ میل ثابت ہوگا۔
چگ نے کہا کہ جموں وکشمیر کے لوگ وزیر اعظم سے بے پناہ محبت کرتے ہیں اور ان کا خطاب سننے کیلئے بڑی تعداد میں جمع ہوتے ہیں۔
بی جے پی جنرل سیکریٹری نے بدھ کے روز یہاں وزیر اعظم کی انتخابی ریلی کے بارے میں میڈیا کے ساتھ بات کرتے ہوئے کہا’’جموں وکشمیر کے لوگ وزیر اعظم نریندر مودی سے بے حد محبت کرتے ہیں‘‘۔
چگ نے کہا’’وہ جب بھی یہاں آتے ہیں تو لوگ جوق در جوق ان کو سننے کے لئے جمع ہوتے ہیں ان کا پروگرام جموں وکشمیر کے لئے سنگ میل ثابت ہوگا‘‘۔
ان کا کہنا تھا کہ وزیر اعظم کی آمد کے پیش نظر سری نگر شہر کو دولہن کی طرح سجایا گیا ہے ۔
بی جے پی جنرل سیکریٹری نے کہا کہ وزیر اعظم جموں وکشمیر کے لوگوں کا وشواس جیتنے میں کامیاب ہوئے ہیں۔
چگ کا کہنا تھا کہ جہاں کل تک بائیکاٹ ہوتا تھا اور بہت کم ووٹنگ شرح درج ہوتی تھی آج وہاں لوگ لمبی لمبی قطاروں میں ووٹ ڈالنے کے لئے کھڑے ہیں۔
بی جے پی لیڈر نے کہا کہ لوگوں کا ہندوستان کی جمہوریت پر اعتماد بحال ہوا ہے ۔انہوں نے کہا کہ سال۱۹۸۷کے انتخابات میں نیشنل کانفرنس اورکانگریس کی حکومت قائم ہونے سے لوگوں کا بیلٹ پر اعتماد ختم ہوا تھا جو آج بحال ہوا ہے ۔