جماعت اسلامی پہلی بار الیکشن نہیں لڑ رہی ہے :شالہ

سرینگر//
جماعت اسلامی کے سابق رکن عبدالرحمان شالہ نے بدھ کے روز بارہمولہ حلقہ انتخاب سے آزاد امید وار کے طور کاغذات نامزدگی جمع کئے ۔
شالہ نے اس موقع پر نامہ نگاروں کے ساتھ بات کرتے ہوئے کہا’’ہم بغیر کسی خوف کے الیکشن لڑ رہے ہیں یہ اچھی بات ہے کہ ہمارے لوگ فام جمع کر رہے ہیں‘‘۔
ان کا کہنا تھا’’بیانیہ بدل گیا ہے ، جماعت اسلامی پر پابندی عائد ہے اس لئے ہم آزاد امید وار کے بطور الیکشن لڑ رہے ہیں، ہم نے سوچا کہ اسمبلی میں کیس پیش کریں گے ‘‘۔
شالہ نے بتایا کہ ایسا نہیں ہے کہ جماعت اسلامی پہلی بار الیکشن میں حصہ لے رہی ہے ۔انہوں نے کہا’’جماعت اسلامی نے۱۹۷۲میں بھی الیکشن لڑے ہیں اور بلدیاتی، اسمبلی یہاں تک کہ پارلیمنٹ الیکشن بھی لڑے ہیں‘‘۔
الیکشن منشور کے بارے میں پوچھے جانے پر ان کا کہنا تھا’’میں ایک آزاد امید وار کی حیثیت سے الیکشن لڑ رہا ہوں، میرے کچھ مطالبے ہیں جن کو میں کامیاب ہونے پر اسمبلی میں پیش کروں گا‘‘۔
محبوبہ مفتی کے بیان کہ جو کل تک آزادی چاہتے تھے آج الیکشن لڑ رہے ہیں کے بارے میں پوچھے جانے پر انہوں نے کہا’’اس سوال کا جواب محبوبہ مفتی سے ہی حاصل کیا جائے ۔‘‘