جموں وکشمیر میں بھی ڈبل انجن کی سرکار بنے گی: جتیندر سنگھ

جموں//
وزیر اعظم دفتر میں تعینات وزیر مملکت ڈاکٹر جتندر سنگھ نے منگل کے روز کہاکہ اسمبلی انتخابات میں بھارتیہ جنتاپارٹی کی جیت یقینی ہے ۔
ڈاکٹر سنگھ نے کہاکہ یہ طے ہے کہ جموںکشمیر میں اس بار ڈبل انجن کی سرکار بننے جارہی ہے ۔
ان باتوں کا اظہار انہوں نے کالا کورٹ راجوری میں چناوی ریلی سے خطاب کے دوران کیا۔
مرکزی وزیرمملکت نے کہاکہ مودی کی سربراہی میں جموں وکشمیر اس وقت ترقی کی راہ پر گامزن ہے ۔انہوں نے کہاکہ جموں وکشمیر میں بھاجپا کا کیڈر کافی مضبوط ہے اور ہم پرامید ہیں کہ اس بار بی جے پی حکومت تشکیل دینے میں کامیاب ہو جائے گی۔
ڈاکٹر سنگھ کا کہنا تھا کہ پارلیمانی الیکشن میں جموں وکشمیر میں ریکارڈ توڑ ووٹنگ ہوئی اور اسمبلی انتخابات میں بھی لوگ گھروں سے باہر کر جمہوری عمل میں بڑھ چڑھ کر حصہ لیں گے ۔
ان کے مطابق موجودہ مرکزی حکومت نے جموں وکشمیر کو نہ صرف امن کا گہوارہ بنایا بلکہ لوگوں کو ان کی دہلیزوں پر انصاف فراہم کرنے کی خاطر کوئی دقیقہ فروگزاشت نہیں کیا ۔
مرکزی وزیر نے کہا’’جموںکشمیر میں جتنے بھی تعمیراتی کام شروع کئے گئے انہیں وقت مقررہ کے اندرا ندر پایہ تکمیل تک پہنچایا جائے گا‘‘۔
داکٹر سنگھ نے الزام لگایا کہ علاقائی سیاسی پارٹیوں نے ہمیشہ مذہب کے نام پر سیاست کی لہذا ایسے سیاستدانوں کواب سبق سکھانے کی ضرورت ہے ۔