وادی میں بارشوں کے بعد موسم میں بہتری واقع

سرینگر//
محکمہ موسمیات کی پیش گوئی کے عین مطابق وادی کشمیر میں دو دنوں کی موسلا دھار بارشوں کے بعد موسم میں بتدریج بہتری واقع ہو رہی ہے ۔
موسمیات محکمے کے ایک ترجمان نے بتایا کہ وادی کشمیر میں۳۱؍اگست اور یکم ستمبر کو موسم مجموعی طور پر خشک رہنے کا امکان ہے تاہم اس دوران کچھ مقامات پر بارشوں کے مختصر مرحلے کو خارج از امکان قرار نہیں دیا جا سکتا ہے ۔
ترجمان نے کہا کہ بعد ازاں۲ستمبر کی شام سے۳ستمبر کی سہہ پہر تک بیشتر مقامات پر ہلکی سے درمیانی درجے کی بارشوں کا امکان ہے ۔
ان کا کہنا تھا کہ وادی میں۴؍اور۵ستمبر کو موسم مجموعی طور پر خشک رہنے کی توقع ہے جبکہ۶؍اور۷ستمبر کو ایک بار پھر کہیں کہیں مختصر مرحلے کی بارشیں ہوسکتی ہیں۔
ترجمان نے کہا کہ بعد ازاں وادی میں۸سے ۱۲ستمبر تک موسم خشک رہنے کا امکان ہے ۔
محکمے نے اپنی ایڈوائزری میں کہا کہ۲؍اور۳ستمبر کو ممکنہ بھاری بارشوں کے نتیجے میں بعض مقامات پر سیلابی ریلے ،مٹی کے تودے گر آنے ، زمین کھسکنے اور چٹانیں کھسک آنے کے خطرات ہیں۔انہوں نے کہا کہ اس دوران نشیبی علاقوں میں پانی جمع ہوسکتا ہے ۔
ایڈوائزری میں ٹریکرز اور سیاحوں سے کہا گیا ہے کہ وہ ایڈوائزری کے مطابق اپنے سفر کا منصوبہ بنائیں۔
دریں اثنا سری نگر میں گذشتہ چوبیس گھنٹوں کے دوران ۸ء۸ملی میٹر بارش ریکارڈ ہوئی ہے ۔وادی کے مشہور سیاحتی مقامات گلمرگ اور پہلگام میں بالترتیب۶ء۱۵ملی میٹر اور۳ء۶ملی میٹر بارش ریکارڈ ہوئی ہے ۔
شمالی ضلع کپوارہ میں۷ء۳ملی میٹر جبکہ گیٹ وے آف کشمیر کے نام سے مشہور قصبہ قاضی گنڈ میں۴ء۲ملی میٹر بارش ریکارڈ ہوئی ہے ۔