سکینہ یتو نے دمہال ہانجی پورہ اسمبلی نشست کیلئے کاغذات نامزدگی جمع کئے

سرینگر//
نیشنل کانفرنس کی سینئر لیڈر سکینہ یتو نے جنوبی کشمیر کے ضلع کولگام کی دمہال ہانجی پورہ اسمبلی نشست کیلئے جمعہ کے روز کاغذات نامزدگی جمع کئے ۔
وہ جمعہ کی صبح ضلع مجسٹریٹ کولگام کے دفتر میں پہنچ گئیں اور وہاں کاغذات نامزدگی جمع کئے ۔اس موقع پر پارٹی کے نائب صدر اور سابق وزیر اعلیٰ عمر عبداللہ بھی ان کے ہمراہ تھے ۔
۲۰۱۴کے اسمبلی انتخابات میں سکینہ یتو کو پی ڈی پی امیدوار عبدالمجید پڈر جو اس وقت اپنی پارٹی کے ساتھ ہیں، نے ہرایا تھا۔تاہم سیاسی مبصرین کے مطابق سکینہ یتو اس اسمبلی نشست کی ایک مضبوط امید وار ہیں۔
اس اسمبلی نشست کیلئے انتخابات کے پہلے مرحلے یعنی۱۸ستمبر کو پولنگ ہوگی جس کیلئے رائے دہندگان کی کل تعداد۹۹ہزار سے زیادہ ہے ۔
الیکشن کمیشن آف انڈیا کی طرف سے جاری نوٹیفکیشن کے مطابق پہلے مرحلے میں اننت ناگ، پلوامہ، شوپیاں، کولگام، ڈوڈہ، رام بن اور کشتواڑ اضلاع کی۲۴؍اسمبلی نشستوں کی پولنگ ہوگی۔جموں وکشمیر کی باقی ۶۶؍اسمبلی نشستوں کی پولنگ دوسرے اور تیسرے مرحلوں میں۲۵ستمبر اور یکم اکتوبر کو ہوگی۔
ادھرپی ڈی پی کے سینئر لیڈر ڈاکٹر محبوب بیگ نے جمعہ کے روز کہا کہ کوئی الائنس یا پارٹی نہیں بلکہ لوگ طاقت کا سرچشمہ ہیں۔انہوں نے کہا کہ اسمبلی انتخابات میں لوگوں کو دیکھنا چاہئے کہ کون سی پارٹی ان کے جذبات کی صحیح ترجماتی کرتی ہے ۔
بیگ نے ان باتوں کا اظہار جمعہ کے روز جنوبی کشمیر کے ضلع اننت ناگ میں نامہ نگاروں کے ساتھ بات کرنے کے دوران کیا جہاں انہوں نے اننت ناگ اسمبلی نشست کے لئے کاغذات نامزدگی جمع کئے ۔
اس موقع پر انہوں نے میڈیا کو بتایا’’طاقت عوام ہیں کوئی پارٹی یا الائنس نہیں ہے ، ہر پارٹی اپنا ایجنڈا لے کر لوگوں کے پاس جائے گی‘‘۔ان کا کہنا تھا’’لوگوں کو دیکھنا ہے کہ کون سی پارٹی ان کے جذبات کی صحیح ترجمانی کرتی ہے ‘‘۔انہوں نے کہا کہ اننت ناگ کے طالب علموں کو اعلیٰ تعلیم حاصل کرنے کیلئے حضرت بل میں واقع کشمیر یونیورسٹی جانا پڑتا تھا لیکن آج ان کو اپنے ہی ضلع میں یونیورسٹی قائم ہے ۔
پی دی پی لیڈر نے کہا’’لوگوں کو الائنس پارٹیوں اور پی ڈی پی کی کارکردگیوں کو دیکھنا چاہئے اور یہ دیکھنا چاہئے کہ پی ڈی پی کی مختصر وقت میں کیا کارکردگی ہے ‘‘۔
بیگ نے کہا’’مجھے لوگوں کے شعور پر بھروسہ ہے وہ ہماری کارکردگی دیکھ کر ہمیں کامیاب کریں گے ‘‘۔
بتادیں کہ اس اسمبلی نشست کے لئے انتخابات کے پہلے مرحلے یعنی۱۸ستمبر کو پولنگ ہوگی۔الیکشن کمیشن آف انڈیا کی طرف سے جاری نوٹیفکیشین کے مطابق پہلے مرحلے میں اننت ناگ، پلوامہ، شوپیاں، کولگام، ڈوڈہ، رام بن اور کشتواڑ اضلاع کی۲۴؍اسمبلی نشستوں کی پولنگ ہوگی۔
جموںکشمیر کی باقی ۶۶؍اسمبلی نشستوں کی پولنگ دوسرے اور تیسرے مرحلوں میں ۲۵ستمبر اور یکم اکتوبر کو ہوگی۔