’کانگریس کے ساتھ گٹھ جوڑ طے‘۔۔۔قبل از الیکشن اتحاد جموں کشمیر کے سبھی ۹۰؍اسمبلی حلقوں میں ہوگا :ڈاکٹر فاروق

سرینگر//
نیشنل کانفرنس کے صدر اور سابق وزیر اعلیٰ‘ ڈاکٹر فاروق عبداللہ کا کہنا ہے کہ کانگریس کے ساتھ قبل از انتخابات اتحاد کو حتمی شکل دی گئی اور اس پر آج شام دستخط ہوں گے ۔
ڈاکٹر فاروق نے کہا کہ جو الائنس بنے گی وہ اچھی طرح چلے گی اور تمام۹۰سیٹوں پر الائنس ہوگی۔
این سی صدر نے ان باتوں کا اظہار جمعرات کو یہاں اپنی رہائش گاہ پر میڈیا کے ساتھ بات کرنے کے دوران کیا۔
قبل ازیں لوک سبھا میں اپوزیشن لیڈر راہل گاندھی اور پارٹی صدر ملک ارکن کھرگے نے ڈاکٹر فاروق عبداللہ اور ان کے فرزند اور عمر عبداللہ کے ساتھ ان کی رہائش گاہ پر ملاقات کی۔
این سی صدر نے میڈیا کو بتایا’’یہ اتحاد ٹریک پر ہے اور انشاء اللہ یہ بالکل اچھی طرح چلے گا، یہ طے پایا ہے اور شام کو اس پر دستخط ہوں گے ‘‘۔انہوں نے کہا’’جموں کشمیر کی تمام۹۰سیٹوں پر اتحاد ہوگا‘‘۔
ڈاکٹر فاروق نے کہا کہ کانگریس اور ہم اکٹھے ہیں اور محمد یوسف تاریگامی بھی ہمارے ساتھ ہیں اور ہم اکٹھے الیکشن لڑیں گے ۔انہوں نے امید ظاہر کی کہ الائنس کی متحدہ کوششوں سے ریاستی درجے کو جلد بحال کیا جائے گا۔
این سی صدر کا کہنا تھا’’لوگوں کے سپورٹ سے ہم انتخابات میں بھاری اکثریت سے کامیابی حاصل کریں گے اور لوگوں کی بہتری کے لئے کام کریں گے ‘‘۔
راہل گاندھی کے ریاستی درجے کی بحالی کے بارے میں پوچھے جانے والے ایک سوال کے بارے میں ڈاکٹر فاروق عبداللہ نے کہا’’ریاستی درجے کی بحالی ہم سب کیلئے بہت ضروری ہے اس کا وعدہ کیا گیا ہے ، اس ریاست نے بہت برے دن دیکھے اللہ کرے سارے اختیارات اس ریاست کو واپس ملیں‘‘۔
این سی صدر نے کہا’’الیکشن لڑنا ہمارا مشترکہ پروگرام ہے تاکہ ان انقسامی طاقتوں کو ہرایا جا سکے جو ملک میں موجود ہیں‘‘۔
پی ڈی پی کے الائنس میں شامل ہونے کے بارے میں ان کا کہنا تھا’’پہلے ہم الیکشن لڑیں گے پھر ان چیزوں کو دیکھا جائے گا کسی کیلئے دروازے بند نہیں ہیں‘‘۔
دفعہ۳۷۰کی بحالی کے بارے میں پوچھے جانے پر سابق وزیر اعلیٰ نے کہا’’ہمارا منشور آپ کے سامنے ہے اس کی بحالی ہمارا اولین ہدف ہے ‘‘۔انہوں نے کہا’’میں آج بہت خوش ہوں کہ سازگار ماحول میں کانگریس کے ساتھ ملک کیلئے بات چیت ہوئی اس کیلئے میں اللہ کا شکر گذار ہوں۔‘‘