سرینگر میں ’بلیدان ستمبھ‘ مکمل طور پر تیار ہے :احمد

سرینگر//
سرینگر میونسپل کارپوریشن (ایس ایم سی) کے کمشنر ڈاکٹر اویس احمد کا کہنا ہے کہ سری نگر کی پرتاب پارک میں بلیدان ستمبھ تیار ہے اور یہاں۱۵اگست کی تقریب کا انعقاد کیا جائے گا۔
احمد نے لوگوں سے بلیدان ستمبھ دیکھنے کی اپیل کرتے ہوئے کہا کہ یہ ملک خاص طور پر جموں و کشمیر کیلئے قربانیاں پیش کرنے والوں کی علامت ہے ۔
بتادیں کہ سرینگر کے وسط میں واقع پرتاپ پارک میں تعمیر ہونے والے بلیدان ستمبھ (شہیدوں کی یاد گار) کا سنگ بنیاد وزیر داخلہ امیت شاہ نے سال گذشتہ کے۲۴جون کو رکھا تھا۔
ایس ایم سی کمشنر نے منگل کو اس بلیدان ستمبھ کا دورہ کرنے کے بعد میڈیا کو بتایا’’۱۵اگست سے پہلے ہی یہ مکمل طور پر تیار ہوا ہے تاکہ اس میں۱۵؍اگست کی تقریب کا انعقاد کیا جا سکے ‘‘۔انہوں نے کہا کہ یہاں۱۳؍اگست کو فل ڈرس ریہرسل بھی منعقد ہوئی۔
احمد کا کہنا تھا’’یہ مکمل طور پر تیار ہے لوگوں سے اپیل ہے کہ وہ یہاں آئیں اور جن لوگوں نے ملک خاص طور پر جموں وکشمیر کے لئے قربانیاں پیش کی ہیں، اس علامت کو دیکھیں‘‘۔
ایس ایم سی کمشنر نے کہا کہ بلیدان ستمبھ دیکھنے کے لئے کسی قسم کی کوئی داخلہ ٹکٹ نہیں ہے ۔انہوں نے کہا کہ یہ لوگوں کے لئے کھلی ہے اور لوگ اپنے بچوں کے ساتھ آکر اس کو دیکھ کر شہیدوں کی قربانیوں کو محسوس کر سکتے ہیں۔
۱۵؍اگست کی تیاریوں کے بارے میں پوچھے جانے پر ان کا کہنا تھا’’ایس ایم سی نے اپنی تمام تر تیاریوں کو مکمل کیا ہے ‘‘۔انہوں نے کہا’’جو ہماری ذمہ تیاریاں جیسے سڑکوں کی مرمت، ڈرینیج سسٹم ٹھیک کرنا، پانی سپلائی کو یقینی بنانا وغیرہ ہوتی ہیں، ان سب کو حتمی شکل دی گئی ہے ۔‘‘