مغل روڈپر حادثہ، کمسن سمیت دو ہلاک ‘۶دیگر زخمی

سرینگر//
جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والے تاریخی مغل روڈ پر جمعے کی سہ پہر ایک نجی گاڑی لڑھک گئی جس کے نتیجے میں کمسن لڑکے سمیت دو افراد ہلاک جبکہ چھ دیگر زخمی ہوئے ہیں۔
اطلاعات کے مطابق ایک بلیرو گاڑی پانار کے مقام پر ڈرائیور کے قابو سے باہر ہو کر گہری کھائی میں جاگری جس کے نتیجے میں گاڑی میں سوار آٹھ افراد شدید طورپر زخمی ہوئے ۔
حادثے کی اطلاع ملتے ہی مقامی لوگ جائے موقع پر پہنچے اور زخمیوں کو طبی امداد کی خاطر گورنمنٹ میڈیکل کالج راجوری منتقل کیا تاہم وہاں پر تعینات ڈاکٹروں نے کمسن لڑکے سمیت دو افرادکو مردہ قرار دیا۔
ہسپتال ذرائع کے مطابق زخمیوں میں سے مزید چار کی بھی حالت نازک بنی ہوئی ہے ۔
دریں اثنا پولیس نے حادثے کی وجوہات جاننے کی خاطر کیس درج کرکے مزید تحقیقات شروع کی ہے ۔
ادھرشمالی کشمیر کے کپواڑہ ضلع کے کیرن علاقے میںجمعہ کے روز سڑک حادثے میں ایک شخص کی جان چلی گئی جبکہ سات دیگر زخمی ہو گئے۔
پولیس نے اس حوالے سے کیس درج کر کے مزید تحقیقات شروع کی ۔
تفصیلات کے مطابق ایک گاڑی کیرن کے علاقے میں الٹ گئی اور اس میں سوار ۸مسافر زخمی ہو گئے۔
پولیس ذرائع نے کہا کہ پولیس پارٹی موقع پر پہنچی اور زخمیوں کو اسپتال منتقل کیا گیا جہاں سے کچھ کو جدید علاج کے لیے سری نگر منتقل کیا گیا۔انہوں نے مزید کہا کہ ایک زخمی شخص جس کی شناخت فرید احمد کے نام سے ہوئی ہے جو کہ پیشے کے اعتبار سے استاد بتایا جاتا ہے سکمز صورہ میں زخموں کی تاب نہ لاتے ہوئے چل۔
جاں بحق شہری کے والد کو شدید چوٹیں آئی ہیں جو زیر علاج ہے۔دوسری جانب پولیس نے نوٹس لے کر تفتیش شروع کردی ہے۔