سرینگر//
جنوبی کشمیر کے ضلع اننت ناگ کے مہمان محلہ میں دوران شب آگ کی ایک بھیانک واردات میں قریب ایک درجن رہائشی مکان اور کم سے کم۷دکان خاکستر ہوگئے ۔
محکمہ فائر اینڈ ایمرجنسی کے ایک عہدیدار نے بتایا کہ اننت ناگ کے مہمان محلے کے گنجان آبادی والے علاقے میں پیر اور منگل کی درمیانی شب قریب تین بجے ایک رہائشی مکان سے آگ نمو دار ہوئی جس کے شعلوں نے متصل واقع مکانوں کو چشم زدن میں اپنی لپیٹ میں لے لیا۔
عہدیدار نے کہا کہ آگ لگنے کے بارے میں اطلاع موصول ہوتے ہی اننت ناگ، مٹن ،بجبہاڑہ، اچھ بل، سیر ہمدان اور شانگس سے قریب دس فائر ٹنڈرس جائے واردات کی طرف بھیج دئے گئے جن آگ کو کنٹرول کرنے میں۵گھنٹے لگ گئے ۔ان کا کہنا تھا کہ آگ کی اس واردات میں۱۱رہائشی مکان اور۷دکان خاکستر ہوگئے ۔
عہدیدار نے بتایا کہ اس آپریشن کے دوران گر جانے وجہ سے فائر سروس کا ڈرائیور امتیاز احمد زخمی ہوگیا جس کو علاج و معالجے کیلئے ہسپتال منتقل کیا گیا۔انہوں نے کہا کہ آگ لگنے کی وجہ معلوم کی جا رہی ہے ۔