بارہمولہ میں خاتون منشیات فروش کے خلاف مقدمہ درج :پولیس

سرینگر//
منشیات فروشوں کے خلاف جنگ کو جاری رکھتے ہوئے پولیس نے شمالی کشمیر کے ضلع بارہمولہ میں ایک بدنام زمانہ خاتون منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بارہمولہ پولیس نے مجاز اتھارٹی سے باقاعدہ اجازت حاصل کرنے کے بعد ایک بدنامہ زمانہ خاتون منشیات فروش کے خلاف پی آئی ٹی این ڈی پی ایس ایکٹ کے تحت مقدمہ درج کیا ہے ۔
ترجمان نے اس منشیات فروش کی شناخت مسکان بیگم زوجہ عرفان احمد شیخ ساکن دیوان باغ بارہمولہ کے طور پر کی ہے ۔
بیان میں کہا گیا کہ مذکورہ منشیات فروش کو گرفتار کرکے سینٹرل جیل سری نگر میں بند رکھا گیا۔
بیان کے مطابق مذکورہ خاتون منشیات فروش کے خلاف کئی مقدمے درج ہیں اور وہ قصبہ بارہمولہ میں منشیات کے کاروبار کے فروغ دینے اور مقامی نوجوانوں کو منشیات فراہم کرنے میں ملوث تھی۔انہوں نے کہا کہ کئی مقدمے درج ہونے کے باوجود وہ اپنی حرکتوں سے باز نہیں آئی۔
قابل ذکر ہے کہ بارہمولہ پولیس نے ضلع میں سال رواں کے پہلے چار مہینوں کے دوران این ڈی پی ایس ایکٹ کے تحت۷۹مقدمے درج کرکے۳۶سخت گیر منشیات فروشوں سمیت۱۴۵منشیات فروشوں کو گرفتار کیا ہے اور ان کی تحویل سے ایک کروڑ۸۸لاکھ روپیے مالیت کا نشہ آور مواد بھی بر آمد کیا ہے ۔