سرینگر//
پیپلز ڈیموکریٹیک پارٹی(پی ڈی پی) کی صدر اور سابق وزیر اعلیٰ محبوبہ مفتی کا دعویٰ ہے کہ پی ڈی پی آج بھی لوگوں کے دلوں میں زندہ ہے ۔
جماعت اسلامی کے انتخابات میں حصہ لینے کے بارے میں انہوں نے کہا’جماعت اسلامی وقت کی نزاکت کو سمجھتی ہے ‘۔
سابق وزیر اعلیٰ نے ان باتوں کا اظہار جمعہ کے روز شمالی کشمیر کے ضلع کپوارہ میں ایک انتخابی ریلی کے حاشیہ پر نامہ نگاروں کے ساتھ بات کرنے کے دوران کیا۔انہوں نے کہا’’پی ڈی پی کو ختم کرنے کی کوشش کی گئی لیکن پی ڈی پی آج بھی لوگوں کے دلوں میں زندہ میں ہے‘‘۔
جماعت اسلامی کے انتخابات میں حصہ لینے کے بیان کے بارے میں پی ڈی پی صدر نے کہا’’جماعت اسلامی نے ۱۹۸۷میں بھی الیکشن لڑے تھے لیکن اس وقت جو دھاندلیاں ہوئی تھیں آج بھی ان کی تیاریاں ہو رہی ہیں‘‘۔
محبوبہ نے کہا’’جماعت اسلامی وقت کی نزاکت سمجھتی ہے ان کو معلوم ہے کہ جمہوری نظام میں ووٹ سے انتقام لیا جا سکتا ہے ‘‘۔
وحید پرہ کے خلاف درج ایف آئی آر کے بارے میں ان کا کہنا تھا’’جب انہوں نے دیکھا کہ لوگ پی ڈی پی کے حق میں باہر آ رہے ہیں تو اس کے نتیجے میں وحید پرہ پر ایسے حملے ہو رہے ہیں‘‘۔
محبوبہ نے کہا کہ پی ڈی پی کو سب سے زیادہ نقصان شمالی کشمیر میں پہنچایا گیا جہاں اس کے لیڈروں کو پارٹی سے نکالا گیا تاہم شمالی کشمیر ہو جنوبی کشمیر ہو یا وسطی کشمیر ہمارا ورکر ہر جگہ ہمارے ساتھ کھڑا رہا۔
انجینئر رشید کے بارے میں پوچھے گئے ایک سوال کے جواب میں انہوں نے کہا’’جس طرح جیلوں میں بند کشمیری مظلوم ہیں انجینئر رشید بھی ان ہی کی طرح ایک مظلوم ہیں‘‘۔
