اکھنور سیکٹر میں دراندازی کی اطلاع کے بعد تلاشی آپریشن شروع:پولیس

جموں//
جموںکشمیر کے اکھنور سیکٹر میں سیکورٹی فورسز نے بڑے پیمانے پر تلاشی آپریشن شروع کیا ہے ۔
ذرائع کا کہناہے کہ فوج کو اطلاع موصول ہوئی ہے کہ دراندازی کے ذریعے دہشت گرد اس طرف آنے میں کامیاب ہوئے ہیں جس کے پیش نظر ایک وسیع العریض علاقے میں ملی ٹینٹ مخالف آپریشن شروع کیا گیا۔
معلوم ہوا ہے کہ ڈرون کیمروں اور ہیلی کاپٹروں کی بھی خدمات حاصل کی گئی ہیں۔
اطلاعات کے مطابق جموں کے اکھنور سیکٹر میں دراندازی کی اطلاع موصول ہونے کے بعد سیکورٹی فورسز نے تلاشی آپریشن لانچ کیا ہے ۔
ذرائع نے بتایا کہ فوج کو مصدقہ اطلاع موصول ہوئی کہ اکھنور سیکٹر میں دراندازی کے ذریعے ملی ٹینٹ اس طرف آنے میں کامیاب ہوئے ہیں جس کو مد نظر رکھتے ہوئے سیکورٹی فورسز نے بین الاقوامی سرحد کے نزدیک رہائشی علاقوں کو محاصرے میں لے لیا۔
ذرائع کے مطابق بی ایس ایف اور ایس او جی نے مشترکہ طورپر آپریشن شروع کیا ہے جس دوران مقامی لوگوں سے بھی پوچھ تاچھ کی جارہی ہے ۔انہوں نے بتایا کہ مشتبہ افراد کو تلاش کرنے کی خاطر ہیلی کاپٹروں کی بھی مدد لی جارہی ہے ۔
دفاعی ذرائع نے بتایاکہ پاکستان کے ساتھ لگنے والی سرحدوں پر ہائی الرٹ جاری کیا گیا ہے تاکہ ملک دشمن عناصر کے منصوبوں کو ناکام بنایاجاسکے ۔
بتادیں کہ حالیہ دنوں کے دوران پاکستان کے ساتھ لگنے والی سرحدوں پر دراندازی کے واقعات میں غیر معمولی اضافہ دیکھنے کو ملا ہے ۔