مجھے کئی علاقوں میں جانے کی اجازت نہیں دی گئی:محبوبہ مفتی

سرینگر//
پی ڈی پی کی صدر اور سابق وزیر اعلیٰ محبوبہ مفتی کا الزام ہے کہ جنوبی کشمیر میں انتخابی مہم کے دوران انتظامیہ نے انہیں کئی علاقوں کا دورہ کرنے کی اجازت نہیں دی۔
محبوبہ نے کہا’’ترال کے لوگوں نے پہلے بھی ہمارا ساتھ دیا ہے اور آگے بھی دیں گے ‘‘۔
سابق وزیر اعلیٰ نے ان باتوں کا اظہار منگل کے روز جنوبی کشمیر کے قصبہ ترال میں ایک انتخابی ریلی کے حاشیہ پر نامہ نگاروں کے ساتھ بات کرنے کے دوران کیا۔
پی ڈی پی صدر نے کہا’’مجھے افسوس کے ساتھ کہنا پڑتا ہے کہ انتظامیہ نے مجھے ترال کے کئی علاقوں میں جانے کی اجازت نہیں دی جس کی وجہ مجھے معلوم نہیں ہے ‘‘۔ان کا کہنا تھا’’جہاں تک ترال کا تعلق ہے تو یہ پورا علاقہ پہلے بھی میرے ساتھ تھا اور آگے بھی ہوگا‘‘۔
محبوبہ نے کہا کہ ترال کے لوگوں کو یہ معلوم ہے کہ پی ڈی پی نے ہی ان کو مشکل حالات سے باہر نکالا۔انہوں نے کہا’’ترقی کے حوالے سے بھی مرحوم مفتی صاحب کے دور میں ترال میں بہت کام ہوئے ‘‘۔
ان کا کہنا تھا’’ترال میں جب حالات مشکل تھے تو ہم نے ہی ان کو ان حالات سے باہر نکالا لوگوں کو ہماری وہ قربانی یاد ہے ‘‘۔
ایک بچی کا ویڈیو وائرل ہونے پر الیکشن کمیشن کی طرف سے نوٹس جاری کرنے کے بارے میں پوچھے جانے پر محبوبہ نے کہا’’وہ ویڈیو ہم نے اپ لوڈ نہیں کی‘ ایک بچی اپنی ماں کے ساتھ میرے پاس آئی اور اس نے تقریر کی جس کو کسی نے وائرل کیا‘‘۔
پی ڈی پی صدر نے کہا’’ہمار اس کے ساتھ کوئی واسطہ نہیں ہے ‘‘۔
بتادیں کہ اس انتخابی مہم کے دوران ان کے ہمراہ سری نگر لوک سبھا سیٹ کے امید وار وحید پرہ بھی تھے ۔سری نگر لوک سبھا سیٹ کے لئے ۱۳مئی کو پولنگ ہوگی۔