400 نشستیں چاہتا ہوں تاکہ کانگریس آرٹیکل 370 کو واپس نہ لائے:وزیر اعظم

دھار/۷مئی
وزیر اعظم نریندر مودی نے منگل کو کہا کہ وہ چاہتے ہیں کہ بی جے پی کی زیرقیادت این ڈی اے موجودہ لوک سبھا انتخابات میں 400 نشستیں حاصل کرے تاکہ یہ یقینی بنایا جاسکے کہ کانگریس کشمیر میں آرٹیکل 370 کو واپس نہ لائے اور ایودھیا میں رام مندر پر "بابری تالا” نہ لگائے۔
مدھیہ پردیش کے دھار میں ایک انتخابی ریلی سے خطاب کرتے ہوئے مودی نے کانگریس پر ڈاکٹر بابا صاحب امبیڈکر کو نیچا دکھانے کا بھی الزام لگایا اور کہا کہ اپوزیشن پارٹی نے یہ کہنا شروع کر دیا ہے کہ آئین کی تشکیل میں ان کا کردار بہت کم تھا۔
مودی نے کہا کہ سچ یہ ہے کہ کانگریس پریوار ڈاکٹر بابا صاحب امبیڈکر سے شدید نفرت کرتا ہے۔
وزیر اعظم نے کہا کہ کانگریس افواہیں پھیلا رہی ہے کہ اگر انہیں 400 لوک سبھا نشستیں ملتی ہیں تو وہ آئین کو تبدیل کردیں گے۔ ایسا لگتا ہے کہ کانگریس کے لوگوں کی ذہانت ان کے ووٹ بینک پر مرکوز ہے۔
مودی نے کہا کہ ملک کے عوام کے لئے یہ جاننا ضروری ہے کہ بی جے پی کی زیرقیادت این ڈی اے کے پاس پارلیمنٹ میں پہلے ہی 400 سے زیادہ نشستیں ہیں۔” ہم نے اس نمبر کا استعمال آرٹیکل 370 (جس نے جموں و کشمیر کو خصوصی درجہ فراہم کیا تھا) کو ختم کرنے کے لئے کیا“۔
وزیر اعظم نے کہا کہ مودی 400 سیٹیں چاہتے ہیں تاکہ کانگریس کھیل خراب کرنے کے لئے آرٹیکل 370 واپس نہ لائے، مودی 400 سیٹیں چاہتے ہیں تاکہ کانگریس ایودھیا میں رام مندر پر بابری تالا نہ لگائے۔
وزیر اعظم نے کہا کہ تقریبا 14 دن پہلے انہوں نے کانگریس کو چیلنج کیا تھا کہ وہ ملک کے 140 کروڑ لوگوں کو لکھ کر دے کہ وہ مذہب کی بنیاد پر ریزرویشن نہیں دے گی۔
مودی نے کہا”دوسری بات، میں نے ان سے تحریری طور پر کہا کہ وہ ایس سی، ایس ٹی اور او بی سی کو دیے جانے والے ریزرویشن کو کبھی نہیں چھینیں گے اور تیسرا تحریری طور پر دیں کہ وہ موجودہ او بی سی کوٹے سے ڈکیتی کرکے مسلمانوں کو کبھی ریزرویشن نہیں دیں گے، لیکن وہ جواب نہیں دے رہے ہیں اور اپنے منہ پر تالا لگا کر خاموش بیٹھے ہوئے ہیں“۔
وزیر اعظم نے کہا”ہم نے ان 400 سے زیادہ سیٹوں کا استعمال ایس سی/ ایس ٹی کوٹہ کو 10 سال کے لیے بڑھانے، پہلی بار کسی آدیواسی خاتون کو ملک کا صدر مقرر کرنے اور خواتین کو ریزرویشن فراہم کرنے کے لیے کیا ہے۔“
وزیر اعظم نے کہا کہ وہ 400 نشستیں مانگ رہے ہیں تاکہ وہ کانگریس اور اپوزیشن انڈیا اتحاد کی ہر سازش کو روک سکیں۔
مودی نے کہا”مودی 400 سیٹوں کی مانگ کر رہے ہیں تاکہ کانگریس ملک کی خالی زمین اور جزیروں کو دوسرے ممالک کے حوالے نہ کرے، وہ ایس سی/ ایس ٹی/ او بی سی کو دیا گیا ریزرویشن واپس نہ لے اور اسے اپنے ووٹ بینک کو نہ دے، اور راتوں رات اپنے ووٹ بینک کی تمام ذاتوں کو او بی سی قرار نہ دے“۔
کانگریس کو نشانہ بناتے ہوئے انہوں نے کہا کہ اپوزیشن پارٹی ڈاکٹر بابا صاحب امبیڈکر کو کریڈٹ نہیں دینا چاہتی۔