بارہمولہ میں منشیات فروش گرفتار، ممنوعہ مواد بر آمد:پولیس

سرینگر//
منشیات کے خلاف جنگ کو جاری رکھتے ہوئے پولیس نے شمالی کشمیر کے ضلع بارہمولہ میں ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے ۔
ایک پولیس ترجمان نے بتایا کہ بارہمولہ پولیس نے ووسن پٹن میں ایک ناکہ چیکنگ کے دوران ایک منشیات فروش کو گرفتار کیا۔
ترجمان نے کہا کہ گرفتار شدہ منشیات فروش کی تحویل سے۳۲گرام چرس جیسا ممنوعہ مواد، سونے کی ایک انگوٹھی اور ڈھائی سو روپیے نقدی بر آمد کئے گئے ۔
بیان میں منشیات فروش کی شناخت لطیف احمد میر ولد غلام محی الدین ساکن واری پورہ تاپر کے طور پر ہوئی ہے ۔
پولیس نے اس سلسلے میں پولیس اسٹیشن پٹن میں این ڈی پی ایس ایکٹ کے تحت ایک کیس درج کرکے مزید تحقیقات شروع کی ہیں۔
قابل ذکر ہے کہ بارہمولہ پولیس نے ضلع میں سال رواں کے پہلے چار مہینوں کے دوران این ڈی پی ایس ایکٹ کے تحت۷۹مقدمے درج کرکے۳۶سخت گیر منشیات فروشوں سمیت۱۴۵منشیات فروشوں کو گرفتار کیا ہے اور ان کی تحویل سے ایک کروڑ ۸۸لاکھ روپے مالیت کا نشہ آور مواد بھی بر آمد کیا ہے ۔