کشمیری پنڈت صبر سے کام لیں:منوج سنہا

سرینگر//
جموںکشمیر کے لیفٹیننٹ گورنر منوج سنہا نے جمعے کے روز کہا کہ کشمیری پنڈتوں کی سیکورٹی اور اْن کے جائز مسائل کو حل کرنے کی خاطر تمام تر اقدامات اْٹھائے جائیں گے۔
سنہا نے کہا کہ کشمیر ی پنڈتوں کو صبر سے کام لینے کی ضرورت ہے۔اْن کے مطابق جموں وکشمیر میں ہر حال میں بھائی چارے کو برقرار رکھا جائے گا۔
ان باتوں کا اظہار لیفٹیننٹ گورنر نے سرینگر میں نامہ نگاروں سے بات چیت کے دوران کیا۔
سنہا نے بتایا کہ چاڈورہ میں کشمیری پنڈت ملازم راہل بھٹ کی ہلاکت کے بعد ایس آئی ٹی کا قیام عمل میں لایا گیا ہے اور اس حوالے سے جوں ہی رپورٹ موصول ہوگی ضروری کارروائی عمل میں لانے سے بھی گریز نہیں کیا جائے گا۔
لیفٹیننٹ گورنرنے کہاکہ کشمیری پنڈتوں کو صبر سے کام لینے کی ضرورت ہے کیونکہ سرکار اْن کی سلامتی کو یقینی بنانے کی خاطر تمام تر اقدامات اْٹھا رہی ہے۔انہوں نے مزید کہا کہ راہل بھٹ کی ہلاکت کے بعد کشمیری پنڈتوں نے جتنے بھی جائز مسائل اْبھارئے اْنہیں حل کرنے کی بھر پور سعی کی جائے گی۔انہوں نے کہاکہ کشمیر وادی میں ہر ایک طبقے سے وابستہ لوگوں جن میں کشمیری پنڈت بھی شامل ہیں کو رہنے کا حق حاصل ہے۔
سنہا نے کہاکہ کشمیری پنڈت وادی میں کافی لمبے عرصے سے کام کر رہے ہیں اور کشمیر کے لوگ بھی چاہتے ہیں کہ وہ یہاں پر سکون کے ساتھ زندگی گزارے۔انہوں نے بتایا کہ انتظامیہ کشمیری پنڈتوں کی سیکورٹی اور اْن کے مفاد کا پوری طرح سے دھیان رکھ رہی ہے۔انہوں نے مزید کہاکہ ہر حال میں بھائی چارے کو برقرار رکھا جائے گا۔
عمر عبدا للہ کے حوالے سے پوچھے گئے سوال کے جواب میں ایل جی منوج سنہا نے کہاکہ اعدادو شمار سے سب واقف ہیں لیکن اتنا میں ضرور کہنا چاہتاہوں کہ پچھلے سالوں کے مقابلے میں کشمیر میں حالات اب کافی بہتر ہوئے ہیں۔
رام بن میں پیش آئے المناک حادثے کے بارے میں ایل جی نے بتایا کہ اس سلسلے میں وہاں پر موجود آفیسران سے بات کی اور یہ کہ بچاو صورتحال پر خود نظر رکھے ہوئے ہوں۔