نئی دہلی//
الیکشن کمیشن آف انڈیا نے اننت ناگ راجوری پارلیمانی حلقہ میں پولنگ کی تاریخ۷ مئی سے ۲۵ مئی کردی ہے ۔
ایک پریس نوٹ میں الیکشن کمیشن نے کہا کہ اسے جموں و کشمیر کی مختلف سیاسی جماعتوں کی جانب سے درخواستیں موصول ہوئی ہیں جن میں پولنگ کی تاریخ کو دوبارہ طے کرنے کی درخواست کی گئی ہے کیونکہ مختلف لاجسٹک ، مواصلاتی اور رابطے کی قدرتی رکاوٹیں انتخابی مہم میں رکاوٹ بن رہی ہیں جو مذکورہ پارلیمانی حلقہ میں مقابلہ کرنے والے امیدواروں کے لئے منصفانہ مواقع کی کمی کے مترادف ہے جس سے انتخابی عمل متاثر ہوسکتا ہے۔
الیکشن کمیشن نے۱۲؍اپریل کو تیسرے مرحلے میں حلقہ کے لئے نوٹیفکیشن جاری کیا تھا اور پولنگ کا دن۷مئی کو مقرر کیا گیا تھا۔
کمیشن نے یو ٹی انتظامیہ کی رپورٹ پر غور کرنے کے ساتھ ساتھ مذکورہ حلقہ کی زمینی صورتحال کا تجزیہ کرنے کے بعد عوامی نمائندگی ایکٹ ۱۹۵۱ کی دفعہ۵۶ کے تحت لوک سبھا ۲۰۲۴ کے عام انتخابات کے سلسلے میں مذکورہ پارلیمانی حلقہ میں رائے دہی کی تاریخ پر نظر ثانی کرنے کا فیصلہ کیا ہے۔
بیان میں ہا گیا ہے کہ اب اس حلقے میں ۲۵مئی کو چھٹے مرحلے میں ووٹنگ ہو گی ۔
کاغذات نامزدگی، جانچ پڑتال اور نام واپس لینے سمیت دیگر تمام قانونی عمل پہلے ہی ختم ہو چکے ہیں اور ۲۰؍ امیدوار میدان میں ہیں۔ الیکشن کمیشن کے ذرائع نے بتایا کہ پولنگ کی تاریخ کے علاوہ شیڈول کے کسی بھی حصے میں کوئی تبدیلی نہیں کی گئی ہے۔
یاد رہے کہ بی جے پی‘ پیپلز کانفرنس اور اپنی پارٹی کے اعلاوہ کچھ دیگر جماعتوں نے اس حلقے میں نا ساز گار موسم کے پیش نظر پولنگ کی تاریخ یہ کو تبدیل کرنے کا مطالبہ کیا تھا ۔
نیشنل کانفرنس اور پی ڈی پی نے اس مطالبے کی یہ کہہ کر مخالفت کی تھی کہ جو جماعتیں تاریخ بدلنے کی درخواست کررہی ہیںو ہ اس حلقے سے الیکشن لڑ نہیں رہی ہے ۔ان جماعتوں کا اشارہ بی جے پی اور پیپلز کانفرنس کی طرف تھا ‘ جنہوں نے اس حلقے میں اپنے امیدوار کھڑا نہیں کئے تھے ۔
۲۰۱۹ میں آرٹیکل ۳۷۰کے خاتمے کے بعد سے لوک سبھا انتخابات پہلا بڑا انتخاب ہے جس نے ریاست کو دو مرکز کے زیر انتظام علاقوں میں تقسیم کردیا تھا۔
سیاسی جماعتیں اننت ناگ حلقہ کے نئے انتخابی نقشے کے ساتھ جدوجہد کر رہی ہیں کیونکہ حد بندیوں نے انتخابی حدود کو بڑی حد تک تبدیل کردیا ہے۔
یہ انتخابات محبوبہ مفتی سمیت ۲۰؍ امیدواروں کی قسمت کا فیصلہ کریں گے جنہیں نیشنل کانفرنس کے قائد میاں الطاف سے چیلنج کا سامنا ہے۔
اودھم پور میں ۱۹؍اپریل، جموں میں ۲۶؍اپریل، سرینگر میں ۱۳ مئی، بارہمولہ میں ۲۰مئی اور اننت ناگ راجوری میں ۲۵ مئی کو ووٹ ڈالے جائیں گے۔