سرینگر؍ ۷ نومبر
شمالی کشمیر کے ضلع بانڈی پورہ میں منشیات مخالف کارروائیوں کے دوران پولیس نے دو الگ الگ واقعات میں ۶ کلوگرام سے زائد چرس نما مادہ ضبط کرکے چار افراد کو گرفتار کرلیا ہے۔
پولیس ترجمان کے مطابق منشیات کے استعمال اور اسمگلنگ کے خلاف جاری مہم کے تحت پولیس نے گاروڑہ کراسنگ پر ناکہ چیکنگ کے دوران دو افراد کو حراست میں لیا اور ان کے قبضے سے ممنوعہ نشہ آور مادہ برآمد کیا۔
گرفتار شدگان کی شناخت رفاقت علی گوجر ساکن ہلوادی ارگام اور ذاکر حسین قریشی ساکن چھپرن ارگام کے طور پر کی گئی ہے۔
پولیس ترجمان نے بتایا کہ ایک اور کارروائی کے دوران کانگری چوک پر ناکہ چیکنگ کے وقت دو مزید افراد کو گرفتار کیا گیا، جن کے قبضے سے تقریباً ساڑھے ۴ کلوگرام چرس نما مادہ برآمد ہوا۔
ان کی شناخت عرفان احمد چوپان ساکن باغ بانڈی پورہ اور عمران احمد شیخ ساکن شیخ محلہ بانڈی پورہ کے طور پر ہوئی ہے۔
پولیس نے دونوں واقعات کے سلسلے میں الگ الگ مقدمات درج کرکے مزید تحقیقات شروع کردی ہیں۔ تحقیقات کے دوران ضبط شدہ منشیات کے ذرائع، اس کے ممکنہ خریداروں اور اس نیٹ ورک سے وابستہ دیگر افراد کا پتہ لگانے کی کوشش کی جارہی ہے۔ (ایجنسیاں)
۔۔۔۔۔(ایجنسیاں )
