رام بن متاثرین کیلئے آپریشنل کچن قائم:ضلع انتظامیہ

جموں/۲۷؍اپریل
جموں وکشمیر کے ضلع رام بن کے برنوٹ علاقے میں اراضی دھنسنے کا واقعہ پیش آنے کے بعد ضلع انتظامیہ نے متاثرہ کنبوں کی مدد کے لئے دن رات چلنے والا آپریشنل کچن قائم کیا ہے ۔
ضلع مجسٹریٹ رام بن بصیر الحق نے’ایکس‘پر اپنے ایک پوسٹ میں کہا’’رام بن ضلع انتطامیہ کی طرف سے کوششیں جا رہی ہیں، پرنوٹ میں کیمپ کی جگہ پر متاثرہ کنبوں کی مدد کیلئے دن رات چلنے والا آپریشنل کچن قائم کیا گیا ہے ‘‘۔
حق نے کہا کہ بچائو کارروائیوں اور باز آباد کاری کی کوششوں کو مزید تیز کر دیا گیا ہے ۔
ضلع مجسٹریٹ پوسٹ میں کہا’’بے گھر کنبوں کو در پیش مسائل کے فوری حل کیلئے ایک ایمرجنسی آپریشن سینٹر بھی قائم کیا گیا ہے ‘‘۔انہوں نے کہا کہ پرنوٹ میں زمین دھنسنے اور رہائشی مکانوں کو نقصان پہنچنے سے پیدا شدہ صورتحال سے فوری طور نمٹا جا رہا ہے ۔
ان کا کہنا ہے کہ متاثرین کو موثر امداد فراہم کرنے کی کوششوں کو یقینی بنایا جا رہا ہے ۔
ادھر ضلع مجسٹریٹ بصیرالحق نے پرنوٹ، جو ضلع صدر مقام سے پانچ کلو میٹر دوری پر واقع ہے ، کا دورہ کرکے متاثرین کو بھر پور مدد کی یقین دہانی کی۔حکام کا کہنا ہے کہ گول سب ڈویژن کو ضلع ہیڈ کوارٹر کے ساتھ جوڑنے کے لئے متبادل سڑک کو تیار کیا گیا ہے ۔
قابل ذکر ہے کہ فروری۲۰۲۳میں سنگلدان کے دکسر دالوا گائوں میں زمین دھنس جانے سے کم سے کم ۱۶رہائشی مکانوں کو نقصان پہنچا تھا اور رام بن اور گول کے درمیان رابطہ منقطع ہوا تھا۔
واضح رہے کہ جموںکشمیر کے رام بن ضلع کے پرنوٹ علاقے میں درمیانی شب اراضی دھنس جانے سے ۴۰سے۵۰رہائشی مکانوں کو نقصان پہنچا جبکہ۲۰مکان پوری طرح سے زمین بوس ہو گئے ۔