گنڈ بل کشتی الٹنے کا سانحہـ: ایک اور لڑکے کی لاش بازیاب‘ ایک ہنوز لاپتہ

سرینگر/۲۷؍اپریل
وسطی کشمیر کے سری نگر کے گنڈ بل علاقے میں ۱۲روز قبل دریائے جہلم میں غرقآب ہوکر لاپتہ ہونے والوں میں سے ہفتے کی صبح ایک اور کمسن کی لاش یہاں سیمنٹ کدل کے نزدیک با زیاب کی گئی۔
بتادیں کہ سری نگر کے گنڈبل علاقے میں۱۶؍اپریل کو ایک کشتی ڈوب جانے سے۶؍افراد کی موت واقع ہوئی تھی جبکہ باپ بیٹے سمیت تین افراد لاپتہ ہوئے تھے جن میں سے جمعہ کے روز ایک کمسن کی لاش بر آمد کی گئی تھی۔
ذرائع نے بتایا کہ ہفتے کی صبح یہاں نور باغ علاقے میں سیمنٹ کدل کے نزدیک ایک اور کمسن کی لاش بر آمد کی گئی۔انہوں نے کہا کہ تیسرے لاپتہ کی لاش بر آمد کرنے کے لئے وسیع پیمانے پر تلاشی آپریشن جاری ہے ۔اس واقعے میں جاں بحق ہونے والوں کی تعداد بڑھ کر۸ہوگئی ہے ۔
واضح رہے کہ واقعہ پیش آنے کے بعد لاپتہ افراد کی تلاش کے لئے این ڈی آر ایف، ایس ڈی آر ایف، فوج، ریور پولیس و دیگر ایجنسیوں سمیت۱۴ٹیموں نے وسیع پیمانے پر آپریشن شروع کر دیا تھا۔