انڈیا بلاک آئین کو بچانے کیلئے اکٹھے ہوا ہے: فاروق

سرینگر//
نیشنل کانفرنس کے صدر اور سابق وزیر اعلیٰ‘ڈاکٹر فاروق عبداللہ کا کہنا ہے کہ انڈیا الائنس کے تحت ہم سب اپنے تشخص اور آئین کو بچانے کیلئے اکٹھے ہوئے ہیں۔انہوں نے کہا کہ انڈیا الائنس ان طاقتوں کے خلاف بنا ہے جو ملک کو الگ الگ کرنا چاہتی ہیں۔
فاروق کا کہنا تھا’’اب روح اللہ صاحب میری جگہ پارلیمنٹ میں جا کر ریاست کے تشخص کو بچائیں گے ‘‘۔
این سی صدر نے ان باتوں کا اظہار جمعرات کو یہاں کانگریس کے ہیڈ کوارٹر پر میڈیا کے ساتھ بات کرنے کے دوران کیا۔ اس موقع پر پردیش کانگریس کمیٹی کے صدر وقار رسول وانی اور نیشنل کانفرنس کے سری نگر لوک سبھا سیٹ کے امید وار آغا روح اللہ بھی موجود تھے ۔
سابق وزیر اعلیٰ نے کہا’’ہماری الائنس مضبوط ہے ، ہم سب اپنے تشخص اور آئین کو بچانے کے لئے اکٹھے ہوئے ہیں‘‘۔
ان کا کہنا تھا’’راجستھان میں وزیر اعظم نے جو تقریر کی اس نے میرے رونگٹھے کھڑے کئے ، وزیر اعظم کو بلا لحاظ مذہب و ملت اور رنگ و نسل ملک کے تمام لوگوں کی خدمت کرنی ہوتی ہے ‘‘۔
ڈاکٹر فاروق نے کہا’’انڈیا الائنس ملک کو الگ الگ کرنے والوں کے خلاف ہی بنی ہے راہل گاندھی جی جب یہاں پد یاترا پر آئے تو انہوں نے بھی یہی کہا کہ انڈیا الائنس آئین کی حفاظت کیلئے بنا ہے ‘‘۔انہوں نے کہا’’میری جگہ پر اب آغا روح اللہ صاحب پارلیمنٹ میں جائیں گے وہ وہاں ہر باشندے کی بات کریں گے ، وہ ریاست کے تشخص کو بچائیں گے ‘‘۔
سابق وزیر اعلیٰ کا کہنا تھا’’انڈیا الائنس کامیاب ہوئی تو جو یہاں خرابیاں ہوئی ہیں ان کو ٹھیک کرنا ہے ، الیکشن کمیشن کو آزاد بنانا ہے ، عدلیہ کو آزاد بنانا ہے ، ایسے گورنروں کو بھیجنا ہے جو دلی کے بجائے لوگوں کی خدمت کریں گے ‘‘۔
سابق وزیر اعلیٰ نے کہا’’ہماری الائنس بہت مضبوط ہے ہم چاہتے ہیں کہ ہندوستان یہ سمجھے کہ جموں وکشمیر ملک کا تاج ہے ‘‘۔
جموںکشمیر پردیش کانگریس کمیٹی کے صدر وقار رسول نے ڈاکٹر فاروق عبداللہ کا پارٹی ہیڈ کوارٹر پر حاضر ہونے کیلئے شکریہ ادا کرتے ہوئے کہا’’اودھم لوک سبھا سیٹ چودھری لال سنگھ اور جموں لوک سبھا سیٹ سے رمن بھلا کامیاب ہوں گے‘‘۔انہوں نے کہا’’کشمیر کی تین سیٹوں پر نیشنل کانفرنس کے امید واروں کے ساتھ کانگریس پوری طاقت سے کھڑی ہے ‘‘۔ان کا کہنا تھا کہ جموں و کشمیر لداخ کی تمام۶سیٹوں پر انڈیا الائنس کی جیت ہوگی۔