نئی دہلی///
لوک سبھا انتخابات کے پہلے مرحلے میں کل ۱۰۲حلقوں کیلئے جمعہ کو۶۰فیصد سے زیادہ ووٹنگ ہوئی۔
لوک سبھا کی کل۵۴۳سیٹوں کیلئے سات مرحلوں میں کرائے جانے والے انتخابات کے پہلے مرحلے میں جمعہ کو۲۱ریاستوں اور مرکز کے زیر انتظام علاقوں کی ۱۰۲سیٹوں پر سخت حفاظتی انتظامات کے درمیان صبح۷بجے سے شام۶بجے تک ووٹنگ ہوئی۔
ان سیٹوں پر کل۶۳ء۱۶کروڑ ووٹروں کو کل۱۶۲۵؍امیدواروں میں سے انتخاب کرنا تھا۔ شام۷ بجے تک الیکشن کمیشن سے موصول ہونے والے اعداد و شمار کے مطابق پہلے مرحلے میں ووٹ ڈالنے والے ووٹروں کا تناسب تریپورہ میں سب سے زیادہ۹۰ء۷۹فیصد رہا، جب کہ بہار میں سب سے کم۴۹ء۴۷فیصد ووٹر اپنا ووٹ ڈالنے کے لیے باہر آئے ۔
کمیشن کے جاری کردہ تازہ ترین اعداد و شمار کے مطابق تریپورہ کی ایک سیٹ پر۹۰ء۷۹فیصد، مغربی بنگال کی تین سیٹوں پر۵۷ء۷۷فیصد‘ منی پور کی دو سیٹوں پر۶۲ء۶۸فیصد، میگھالیہ کی دو سیٹوں پر۲۰ء۷۰فیصد اور آسام میں پانچ سیٹوں پر۳۸ء۷۱فیصد ووٹ ڈالے گئے ۔
پڈوچیری کی ایک سیٹ پر۲۵ء۷۳فیصد، چھتیس گڑھ کی ایک سیٹ پر۴۱ء۶۳فیصد ووٹروں نے اپنے حق رائے دہی کا استعمال کیا۔ اسی طرح جموں و کشمیر کی ایک سیٹ پر ۰۸ء۶۵فیصد، مدھیہ پردیش کی پانچ سیٹوں پر۳۳ء۶۳فیصد، اروناچل پردیش میں دو سیٹوں پر۴۶ء۶۵فیصد، سکم میں ایک سیٹ پر۰۶ء۶۸فیصد، ناگالینڈ کی ایک سیٹ پر۷۷ء۵۶فیصد ووٹروں نے اپنا حق رائے دہی استعمال کیا۔
میزورم کی ایک سیٹ پر۱۸ء۵۴فیصد، اتر پردیش میں آٹھ سیٹوں پر۵۷۸۶۱فیصد، اتراکھنڈ میں پانچ سیٹوں پر۶۴ء۵۳فیصد، انڈمان اور نکوبار کی ایک سیٹ پر۸۷ء۵۶فیصد، مہاراشٹر کی پانچ سیٹوں پر۲۹ء۵۵فیصد، لکشدیپ کی ایک سیٹ پر۰۲ء۵۹فیصد، راجستھان کی۱۲ سیٹوں پر۹۵ء۵۰فیصد، تمل ناڈو کی۳۹سیٹوں پر۱۹ء۶۲فیصد ووٹ ڈالے گئے ۔
ووٹنگ صبح ۷بجے شروع ہوئی جو شام۶بجے تک جاری تھی۔
مغربی بنگال، شمال مشرقی راجستھان اور دیگر مقامات کے مختلف پولنگ اسٹیشنوں پر صبح سے ہی مرد و خواتین ووٹروں کی لمبی قطاریں لگ گئیں۔ پہلی بار ووٹ کا حق حاصل کرنے والے نوجوان ووٹروں میں ووٹ ڈالنے کے حوالے سے کافی جوش و خروش تھا۔
الیکشن کمیشن کی طرف سے جاری کردہ ایک بیان کے مطابق’’تمام ۲۱ریاستوں اور مرکز کے زیر انتظام علاقوں میں ووٹنگ کے پہلے مرحلے کا عمل آسانی سے اور پرامن طریقے سے جاری ہے ۔ اروناچل پردیش کی۶۰؍اور سکم کی تمام ۳۲؍اسمبلی سیٹوں پر بھی آج ووٹنگ ہوئی‘‘۔
الیکشن کمیشن نے ووٹنگ کے آزادانہ اور منصفانہ انعقاد کو یقینی بنانے کے لیے مبصرین کو تعینات کرنے کے علاوہ سیکورٹی کے وسیع انتظامات کئے ہیں۔ چیف الیکشن کمشنر اپنے دو ساتھی الیکشن کمشنروں گیانیش کمار اور سکھویر سنگھ سندھو کے ساتھ کمیشن کے ہیڈکوارٹر سے پورے عمل کی نگرانی کر رہے ہیں۔