یو پی ایس سی کے نتائج: جموں کشمیر سے ۱۱؍امیدواروں کی کامیابی

سرینگر//
جموں و کشمیر کے گیارہ امیدواروں نے اس سال یونین پبلک سروس کمیشن (یو پی ایس سی) سول سروس کے امتحانات کے لیے کوالیفائی کیا ہے۔
یو پی ایس سی امتحانات کے نتائج کا اعلان کمیشن نے منگل کو کیا تھا۔
یو پی ایس سی کی جانب سے جاری نوٹیفکیشن میں کہا گیا ہے کہ اس سال سول سروس کا امتحان۱۰۱۶ امیدواروں نے پاس کیا ہے جس میں ریاست اتر پردیش کے آدتیہ سریواستو نے سلیکشن لسٹ میں ٹاپ کیا ہے۔
جموں و کشمیر کے پہاڑی ضلع ڈوڈہ کے چوبیس سالہ انمول راٹھور نے امتحان میں ساتویں آل انڈیا رینک (اے آئی آر) حاصل کی ہے۔ انمول نے جموں و کشمیر سول سروس امتحان (جے کے سی ایس ای)۲۰۲۲ میں بھی ٹاپ کیا تھا اور اس وقت جموں کے ریونیو ٹریننگ انسٹی ٹیوٹ میں تربیت حاصل کر رہی ہیں۔
انمول نے اس موقع پر کہا کہ انہوں نے اپنی تعلیم اپنے گھر سے ہی مکمل کی، سوائے کچھ ماک ٹیسٹوں اور یو پی ایس سی مینز ٹیسٹ سیریز کے، جس کیلئے انہوں نے دہلی میں شرکت کی تھی۔
انمول کے مطابق ’’میں نے آن لائن دستیاب مواد کا استعمال کرتے ہوئے از خود (یو پی ایس سی کے لیے) تیاری کی۔ میں کہوں گی کہ اس خطے کے نوجوانوں میں بہت زیادہ صلاحیت موجود ہے بشرطیکہ ان کی توانائی کو صحیح سمت میں استعمال کیا جائے۔‘‘
کٹھوعہ ضلع کے ایک اور امیدوار ارجن گپتا نے سلیکٹ لسٹ میں۳۲ واں رینک حاصل کی ہے۔
سرینگر ضلع کے منان بھٹ نے اس سال ۸۸ واں درجہ حاصل کیا ہے۔ اس سے قبل وہ سول سروسز کے امتحان میں بھی۲۳۱ اے آئی آر حاصل کر کے کوالیفائی کر چکے تھے۔ اس وقت بھٹ تلنگانہ کیڈر میں آئی پی ایس افسر ہیں۔
جموں کے ہرنیت سنگھ سوڈان نے۱۷۷‘ محمد حارث میر نے۳۴۵‘، محمد فرحان نے ۳۶۹‘ اپراجیتا آریان نے ۳۸۱‘ غلام محی الدین نے ۳۸۸‘ سوون شرما نے ۴۱۲‘ سیرت باجی نے ۵۱۶؍ اور دنیش کمار نے ۱۰۰۳؍ اے آئی آر حاصل کی ہے۔