جموں//
جموں و کشمیر کے ضلع رام بن میں قومی شاہراہ پر بیٹری چشمہ علاقے کے نزدیک ایک مسافر بر دار ٹیکسی کے ایک گہری کھائی میں جا گرنے کے نتیجے میں کم سے کم۱۰؍افراد لقمہ اجل بن گئے ۔
پولیس ذرائع نے بتایا کہ جموں سے سرینگر جا رہی ایک ٹیکسی قومی شاہراہ پر بیٹری چشمہ علاقے کے نزدیک لڑھک کر قریب۸سو فٹ گہری کھائی میں جا گری جس کے نتیجے میں کم سے کم دس افراد کی موت واقع ہوئی۔
جموں وکشمیر پولیس نے ’ایکس‘پر ایک پوسٹ کے ذریعے جانکاری فراہم کرتے ہوئے کہا’’رام بن کے بیٹری چشمہ علاقے کے نزدیک قومی شاہراہ پر ایک مسافر بر دار ٹیکسی ایک گہری کھائی میں جا گری‘‘۔انہوں نے کہا کہ پولیس، ایس ڈی آر ایف اور سیول کیو آر ٹی رام بن جائے واردات پر موجود ہیں اور بڑے پیمانے پر بچائو آپریشن شروع کیا گیا ہے ۔
پولیس ذرائع نے بتایا کہ انہیں اس حادثے کے متعلق رات کے سوا ایک بجے اطلاع موصول ہوئی۔انہوں نے کہا کہ فی الوقت کھائی سے برستی بارش کے بیچ دس لاشوں کو نکالا گیا ہے جن میں سے دو کی شناخت معلوم ہوئی ہے ۔
رام بن کے سینئر سپرنٹنڈنٹ آف پولیس (ایس ایس پی) انوج کمار نے کہا کہ سڑک پر بولارڈ ٹوٹ گیا تھا، جس سے ظاہر ہوتا ہے کہ گاڑی ۸۰ سے ۱۰۰ کلومیٹر فی گھنٹہ کی رفتار سے سفر کر رہی تھی۔
شناختی کارڈوں کے مطابق ایک کی شناخت ۴۷سالہ بلون سنگھ ولد پورب سنگھ ساکن امبگروٹہ جموں جبکہ دوسرے کی شناخت وپن مکھایا ولد ویشو ناتھ مکھایا ساکن مغربی چمپارن بہار کے طور پر ہوئی ہے ۔
دریں اثنا مرکزی وزیر ڈاکٹر جتندرسنگھ نے اس دلخراش سڑک حادثے پر اظہار رنج و غم کرتے ہوئے’ایکس‘پر ایک پوسٹ میں کہا’’رام بن کے چشمہ شاہی علاقے کے نزدیک جموں ،سری نگر قومی شاہراہ پر پیش آنے والے دلدوز سڑک حادثے جس میں ایک ٹیکسی کے گہری کھائی میں جا گرنے سے۱۰؍افراد کی موت واقع ہوئی، کے بارے میں معلوم ہونے کے بعد ضلع مجسٹریٹ رام بن بصیر الحق کے ساتھ بات کی‘‘۔
مرکزی وزیر نے کہا کہ پولیس، ایس ڈی آر ایف اور سیول کیو آر ٹی جائے واردات پر پہنچ گئے ہیں اور بچائو آپریشن جاری ہے ، میں انتظامیہ کے ساتھ مسلسل رابطے میں ہوں۔
اس دوران صدر دروپدی مرمو نے جمعہ کے روز رام بن حادثے میں ہونے والے جانی نقصان پر افسوس کا اظہار کیا اور سوگوار خاندانوں سے تعزیت کا اظہار کیا۔
جموں سرینگر قومی شاہراہ پر رام بن ضلع میں بیٹری چشمہ کے قریب ایک ایس یو وی پھسل کر گہری کھائی میں گرنے سے ۱۰مسافروں کی قیمتی جانیں چلی گئیں۔
مرمو نے ایکس پر ہندی میں ایک پوسٹ میں کہا’’جموں سرینگر قومی شاہراہ پر رام بن علاقے میں ایک گاڑی کے کھائی میں گرنے سے لوگوں کے ہلاک ہونے کی خبر بہت افسوسناک ہے۔میں سوگوار خاندانوں کے ساتھ اپنی تعزیت کا اظہار کرتا ہوں۔‘‘