باغات ’کاٹھی دروازہ اور حول میں آتشزدگی کی واردات میں تعمیرات کونقصان

سرینگر//
سرینگر کے باغات علاقے میں جمعے کے روز آتشزدگی کی ایک واردات میں رہائشی مکان کو نقصان پہنچا ہے ۔
اطلاعات کے مطابق جموں وکشمیر کی گرمائی راجدھانی سری نگر کے باغات علاقے میں جمعے بعد دوپہر رہائشی مکان سے آگ نمودار ہوئی جس نے آناً فاناً مکان کو پوری طرح سے اپنی لپیٹ میں لے لیا۔
اسسٹنٹ ڈائریکٹر عاقب احمد کی سربراہی میں فائر اینڈ ایمرجنسی کی ٹیم فوری طورپر جائے موقع پر پہنچی اور آگ بجھانے کی کارروائی شروع کی۔
معلوم ہوا ہے کہ انتھک کوشش کے بعد آگ پر قابو پایا گیا تاہم آتشزدگی کی اس واردات میں رہائشی مکان کی اوپری منزل کو نقصان پہنچا ہے ۔
دریں اثنا پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ۔
وسطی ضلع سری نگر میں آتشزدگی کی الگ الگ وارداتوں میں ایک رہائشی، تین دکانوں اور ایک بجلی ٹرانسفارفر کو نقصان پہنچا ہے ۔
محکمہ فائر اینڈ ایمرجنسی کے عہدیدار نے بتایا کہ سری نگر کے کاٹھی دروازہ علاقے میں جمعرات کی رات قریب گیارہ بجے ایک بجلی ٹرانسفارمر سے آگ بھڑکی جس کے شعلوں نے متصل ہی واقع دو دکانوں کو اپنی لپیٹ میں لے لیا۔انہوں نے کہا کہ آگ کی اس واردات میں بجلی ٹرانسفارمر اور دونوں دکانوں کو نقصان پہنچا۔ان کا کہنا تھا کہ آتشزدگی کی ایک اور واردات میں سری نگر کے کرال پورہ علاقے میں ایک دو منزلہ مکان کو نقصان پہنچا۔انہوں نے کہا کہ آگ کی اس واردات میں اس رہائشی مکان کی بالائی منزل کو نقصان پہنچا اور شارٹ سرکٹ آگ کی وجہ بتائی جا رہی ہے ۔
سرکاری ذرائع نے بتایا کہ سری نگر کے حول چوک میں جمعرات اور جمعہ کی درمیانی شب آگ کی ایک اور واردات پیش آئی جس کے نتیجے میں ایک دوم منزلہ شاپنگ کمپلیکس کے ایک دکان کو نقصان پہنچا۔انہوں نے کہا کہ تاہم آگ کی ان وارداتوں میں کسی جانی نقصان کی کوئی اطلاع نہیں ہے ۔دریں اثنا پولیس نے ان وارداتوں کے سلسلے میں مقدمے درج کرکے کارروائیاں شروع کی ہیں۔