جموں/29 مارچ
جموں و کشمیر کے ضلع رام بن میں قومی شاہراہ پر بیٹری چشمہ علاقے کے نزدیک ایک دلدوز سڑک حادثے میں 10 افراد لقمہ اجل بن گئے جبکہ بچاﺅ آپریشن وسیع پیمانے پر جاری ہے ۔
ذرائع نے بتایا کہ رام بن کے بیٹری چشمہ علاقے کے نزدیک سرینگر، جموں قومی شاہراہ پر جمعرات اور جمعہ کی درمیانی شب جموں سے سری نگر جارہی ایک تویرا گاڑی سڑک سے لڑھک کر گہری کھائی میں جا گری۔
ذرائع نے بتایا کہ حادثے کے بعد وسیع پیمانے پر ریسکیو آپریشن شروع کیا گیا اور فی الوقت دس لاشوں کو کھائی سے نکالا گیا۔ان کا کہنا تھا کہ گاڑی میں سوار یہ مسافر مزودر لگتے ہیں جو کام کے سلسلے میں سری نگر جا رہے تھے ۔
ذرائع نے بتایا کہ گاڑی میں سوار کل مسافروں کی تعداد ابھی معلوم نہیں ہوسکی ہے تاہم قریب ہزار فٹ کھائی سے اب تک 10 لاشیں نکالی گئی ہیں۔انہوں نے کہا کہ گاڑی کا رجسٹریشن نمبر بھی ابھی معلوم نہیں ہوسکا ہے تاہم بچاﺅ آپریشن ہنوز جاری ہے ۔
دریں اثنا مرکزی وزیر ڈاکٹر جتندر سنگھ نے اس دلخراش سڑک حادثے پر اظہار رنج و غم کرتے ہوئے ’ایکس‘پر ایک پوسٹ میں کہا”رام بن کے چشمہ شاہی علاقے کے نزدیک جموں ،سری نگر قومی شاہراہ پر پیش آنے والے دلدوز سڑک حادثے جس میں ایک ٹیکسی کے گہری کھائی میں جا گرنے سے 10 افراد کی موت واقع ہوئی، کے بارے میں معلوم ہونے کے بعد ضلع مجسٹریٹ رام بن بصیر الحق کے ساتھ بات کی“۔
سنگھ نے کہا کہ پولیس، ایس ڈی آر ایف اور سیول کیو آر ٹی جائے واردات پر پہنچ گئے ہیں اور بچاﺅ آپریشن جاری ہے ، میں انتظامیہ کے ساتھ مسلسل رابطے میں ہوں۔
موصوف وزیر نے پسماندگان کے ساتھ اظہار تعزیت کیا۔اس سلسلے میں مزید تفصیلات کا انتظار ہے
۔
