سرینگر اور شوپیاں میں آتشزدگی کی وارداتوں میں پانچ رہائشی مکانات خاکستر

سرینگر//
سرینگر اور شوپیاں میں آگ کی دو الگ وارداتوں میں پانچ رہائشی مکان اور دو گاو خانے خاکستر ہوئے ہیں۔ لاکھوں روپیہ مالیت کی گھریلو اشیائراکھ کے ڈھیر میں تبدیل۔
اطلاعات کے مطابق پائین شہر کے پتھر مسجد علاقے میں درمیانی شب رہائشی مکان سے آگ نمودار ہوئی جس نے آناً فاناً اپنے متصل تین مکانوں کو لپیٹ میں لے لیا۔
عین شاہدین نے بتایا کہ منگل اور بدھ کی درمیانی شب پتھر مسجد سری نگر میں پرویز احمد صوفی کے رہائشی مکان سے آگ نمودار ہوئی جس نے چند سیکنڈوں کے اندر اندر ہی مزید تین مکانوں کو لپیٹ میں لے لیا۔
انہوں نے بتایا کہ فائر اینڈ ایمرجنسی اور مقامی لوگوں کی کارروائی کے نتیجے میں گر چہ آگ پر قابو پایا گیا تاہم آتشزدگی کی اس واردات میں چار رہائشی مکان پوری طرح سے خاکستر ہوئے ہیں۔
مقامی لوگوں نے ضلعی ترقیاتی کمشنر سرینگر سے اپیل کی ہے کہ متاثرین کی باز آباد کاری کی خاطر فوری طورپر اقدامات اٹھائے جائیں۔
فائر اینڈ ایمرجنسی کے ایک سینئر عہدیدار نے یو این آئی اردو کو بتایا کہ درمیانی شب پتھر مسجد سری نگر میں رہائشی مکان سے آگ نمودار ہونے کی اطلاع ملتے ہی فائر ٹینڈ رجائے موقع پر پہنچے ۔انہوں نے کہاکہ ۱۶فائر ٹینڈروں کی مدد سے آگ پر قابو پایا گیاتاہم آتشزدگی کی اس واردات میں چار رہائشی مکان خاکستر ہوئے ہیں۔
دریں اثنا شوپیاں کے ٹکرو گاوں میں بھی آگ کی ایک واردات میں رہائشی مکان اور دو گاو خانے خاکستر ہوئے ہیں۔
پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی ۔