بڈگام‘ کولگام اور بارہمولہ میں چار منشیات فروش گرفتار

سرینگر//
پولیس نے بڈگام ، کولگام اور بارہ مولہ میں چار منشیات فروشوں کو گرفتار کر کے ان کے قبضے سے ممنوع نشیلی اشیاء برآمد کرکے ضبط کی ۔
پولیس کے ایک ترجمان نے بتایا کہ پولیس اسٹیشن بیروہ کی ایک پولیس پارٹی نے سادی پورہ علاقے میں ایک ناکے کے دوران ایک آٹوکو روکا جو سونہ پاہ سے کنڈورہ کی طرف جا رہا تھا۔
ترجمان نے کہا’’تلاشی کے دوران آٹو سے قریب۵۳۴گرام وزنی چرس جیسا مواد اور مکی کے بھوسے میں لپٹے ہوئے۱۱۵گرام وزنی چرس کی۶چھڑیاں بر آمد کی گئیں‘‘۔
بیان میں کہا گیا کہ آٹو ڈرائیور نے اپنی شناخت گلزار احمد شیخ ولد حبیب اللہ شیخ ساکن سامبورہ پلوامہ کے طور پر کی۔انہوں نے کہا کہ مذکورہ ڈرائیور کو بر سر موقع ہی گرفتار کیا گیا اور آٹو کو بھی ضبط کیا گیا۔
ترجمان کا کہنا ہے کہ اس سلسلے میں پولیس اسٹیشن بیروہ میں ایک متعلقہ دفعات کے تحت ایک کیس درج کرکے مزید تحقیقات شروع کی گئی ہیں۔
ایس ایچ او پولیس اسٹیشن یاری پورہ کی سربراہی میں پولیس ٹیم نے سونمن پل کے نزدیک دو افراد جن کی شناخت سمن دیپ سنگھ ولد بہادر سنگھ اور کمل جیت کور دختر سنتوک سنگھ ساکنان تلوانڈی مالیا کے بطور ہوئی کی گرفتاری عمل میں لا کر ان کے قبضے سے ۲۰گرام برون شوگر برآمد کیا۔
دریں اثنا بارہ مولہ میں نور کھاہ کے نزدیک پولیس نے ناکہ لگایا جس دوران دلشاد احمد وار ولد غلام قادر ساکن لچھی پورہ کو روک کر اس کی جامہ تلاشی لی گئی۔
پولیس کے مطابق تلاشی کے دوران منشیات فروش کے قبضے سے۷۰گرام چرس برآمد ہوا۔
پولیس نے عوام الناس سے ایک دفعہ پھر اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کریں۔