یوکرین میں پھنسے جموںکشمیر کے تمام طلبا بحفاظت نکال لئے گئے

سرینگر/۱۲مارچ
روس اور یوکرین کے درمیان موجودہ کشیدگی کے بیچ یوکرین میں پھنسے جموں وکشمیر کے تمام طلبا کو بحفاظت نکال لیا گیا ہے ۔
سرکاری ذرائع نے بتایا کہ یوکرین میں پھنسے جموں وکشمیر کے۱۴۰سے۱۴۵طلبا کو بحفاظت نکال لیا گیا ہے ۔انہوں نے کہا کہ نو طالب علموں پر مشتمل آخری کھیپ پو لینڈ کے راستے سے گذشتہ شب دلی پہنچ گئی۔ان کا کہنا تھا کہ جموں وکشمیر حکومت نے دلی میں ان طلبا کے قیام و طعام و دیگر چیزوں کو بندو بست کر رکھا تھا۔
ذرائع نے کہا کہ یونین ٹریٹری کے لیفٹیننٹ گورنر منوج سنہا یوکرین سے طلبا کے انخلا کے عمل کی ذاتی طور پر نگرانی کر رہے تھے ۔
دریں اثنا جموں و کشمیر سٹوڈنٹس ایسو سی ایشن نے حکومت کے یوکرین سے طلبا کے بحفاظت انخلا کے اقدام کی سراہنا کی ہے اور اس کا شکریہ ادا کیا ہے ۔
ایسو سی ایشن کے ترجمان ناصر کھویہامی نے اپنے ایک ٹویٹ میں کہا کہ یوکرین بشمول سمی سٹیٹ میں پھنسے جموں وکشمیر کے تمام طلبا کو نکال لیا گیا۔انہوں نے کہا کہ سمی سٹیٹ میں جو کشمیری طلبا درماندہ ہوئے تھے ہفتے کو دلی سے اپنے گھر لوٹیں گے ۔