میلہ کھیر بھوانی کیلئے سیکورٹی کے پختہ انتظامات کئے گئے ہیں:بردی

سرینگر//
انسپکٹر جنرل آف پولیس (آئی جی پی) کشمیر وی کے بردی کا کہنا ہے کہ میلہ کھیر بھوانی کے لئے سیکورٹی کے تمام ضروری انتظامات کئے گئے ہیں۔
آئی جی پی نے ان باتوں کا اظہار ہفتے کے روز نامہ نگاروں کے سوالوں کا جواب دینے کے دوران کیا۔
ان کاکہنا تھا’’جیسا آپ جانتے ہیں کہ میلہ کھیر بھوانی جلد ہی شروع ہونے والا ہے اور ۳جون کو اہم فنکشن ہے۔اس میلے میں شرکت کرنے کیلئے پوری وادی سے عقیدت مند آتے ہیں‘‘۔
آئی جی پی نے کہا’’جموںکشمیر پولیس نے پیرا ملٹری فورسز اور ٹریفک ٹیموں کے ساتھ مل کر کام کیا ہے تاکہ اس ایونٹ کے محفوظ اور ہموار انعقاد کو یقینی بنایا جا سکے ‘‘۔
بردی نے کہا کہ تمام تیاریاں احتیاط سے کی گئی ہیں تاکہ عقیدت مندوں کو کسی قسم کی پریشانی کا سامنا نہ کرنا پڑے ۔
حالیہ پہلگام حملے کے بعد خدشات کے بارے میں پوچھے جانے پر انہوں نے کہا’’امرناتھ یاترا سمیت اہم تقریبات کے لیے سیکورٹی کا ہمیشہ جائزہ لیا جاتا ہے اور اسے مضبوط بنایا جاتا ہے‘‘۔انہوں نے مزید کہا کہ گزشتہ سال سیکورٹی کے سخت انتظامات کیے گئے تھے اور اس سال بھی اسی سطح کی سیکورٹی برقرار رکھی جائے گی۔