سرینگر//
نیشنل کانفرنس نے کہا کہ وہ کشمیر کی تین پارلیمانی سیٹوں پر انتخابات لڑے گی، جبکہ جموں کی دو سیٹوں اور لداخ کی ایک سیٹ پر کانگریس کے ساتھ انڈیا الائنس کے تحت انتخابات لڑنے پر گفتگو چل رہی ہے۔
نیشنل کانفرنس کے صوبائی صدر ناصر اسلم وانی نے کہاکہ آج پارلیمانی بوڈ کی جو میٹنگ سرینگر میں منعقد ہوئی اس میں یہی فیصلہ کیا گیا کہ نیشنل کانفرنس کپواڑہ،بارہمولہ‘ سرینگر،پلوامہ اور اننت ناگ،راجوری پر پارٹی کے امیدوار نامزد کرے گی، جبکہ لداخ، ادھمپور اور جموں کی پارلیمانی سیٹوں پر کانگرس کے ساتھ انڈیا الائنس کے تحت انتخابات لڑئے جائیں گے۔
غور طلب ہے کہ پارلیمانی انتخابات کے پیش نظر نیشنل کانفرنس کے پارلیمانی بورڈ نے آج خصوصی اجلاس منعقد کیا، جس میں نیشنل کانفرنس کے صدر فاروق عبداللہ نے لیڈران پر زور دیا کہ وہ پارٹی کی مضبوطی کے لئے عوامی رابطہ مہم تیز کرے۔
نیشنل کانفرنس نے اگرچہ اس اجلاس کے بعد میڈیا کو بیان جاری کیا جس میں امیدواروں کے نام ظاہر نہیں کئے گئے ہیں، تاہم فاروق عبداللہ نے کارکنان کو اپنے پیغام میں کہا کہ وہ پارلیمانی انتخابات کے پیش نظر عوامی رابطہ مہم میں سرعت لائے اور پارٹی کو مضبوط کرے۔
یہ اجلاس آج اسلئے منعقد کیا گیا کیونکہ نیشنل کانفرنس کے نائب صدر عمر عبداللہ گزشتہ روز دہلی سے کشمیر واپس آئے تھے۔ ذرائع کا کہنا ہے کہ عمر عبداللہ نے دہلی میں کانگرس قیادت کے ساتھ انڈیا الائنس کے تحت سیٹ شیئرنگ پر تبادلہ خیال کیا۔
یاد رہے کہ کانگرس اور نیشنل کانفرنس کے مابین انڈیا لائنس کے تحت جموں کی دو سیٹوں اور کشمیر کی دو سیٹوں پر متحدہ انتخابات لڑنے پر مفاہمت ہوئی ہے، لیکن نیشنل کانفرنس پی ڈی پی صدر محبوبہ مفتی کو اننت ناگ،راجوری نشست پر انڈیا الائنس کا امیدوار نامزد کرنے میں راضی نہیں ہے۔ کانگرس قیادت کی جانب سے محبوبہ مفتی کو اس سیٹ پر امیدوار نامزد کرنے میں کوئی قباحت نہیں ہے۔
ذرائع نے بتایا کہ کانگرس قیادت نیشنل کانفرنس کو قائل کرنے کی کوشش کر رہی ہے کہ وہ محبوبہ مفتی کو حمایت کرے اور انڈیا الائنس کو جموں کشمیر میں کامیاب بنائے۔
ذرائع نے بتایا کہ نیشنل کانفرنس کی طرف سے اس ضمن میں آج پارلیمانی بوڈ میں تبادلہ خیال کیا گیا اور پارٹی قیادت کر فیصلہ کرنے کا اختیار دیا۔