سرینگر//
خراب موسمی صورتحال کے پیش نظر حکام نے ٹریفک رورل کشمیر کے دائرہ اختیار میں آنے والے پہاڑی علاقوں میں ڈرائیوروں اور مسافروں کے تحفظ کو یقینی بنانے کیلئے ایک ٹریفک ایڈوائزری جاری کی ہے ۔
ٹریفک پولیس افسر رورل کشمیر کی طرف سے جاری ایڈوائزری میں کہا گیا ہے’’متعلقہ سرکاری اداروں کی طرف سے برف ہٹائے جانے تک پہاڑی رابطہ سڑکوں پر کسی بھی گاڑی کو چلنے کی اجازت نہیں ہوگی اور بڑی پہاڑی سڑکوں پر صرف۴بائی۴گاڑیوں جن میں اینٹی سکڈ چیبننز لگی ہوں اور جن کی سینٹنگ گنجائش ۱۰سے زیادہ نہ ہو، کو ہی چلنے کی اجازت ہوگی‘‘۔
ایڈوائزری میں کہا گیا ہے کہ بڑی مال بردار اور مسافر بر دار گاڑیوں کو سڑکوں سے برف ہٹنے اور پھلسن ختم ہونے کے بعد ہی چلنے کی اجازت دی جائے گی۔
مذکورہ ایڈوائزری میں مزید کہا گیا’’ٹریفک رورل کشمیر کے دائرہ اختیار میں آنے والے علاقوں میں اوور لوڈنگ کیلئے زیر ٹالیرنس کی پالیسی ہے اور دستاویزات کے بغیر گاڑی چلانے والوں کے خلاف سخت کارروائی عمل میں لائی جائے گی۔‘‘
اس دوران جموںکشمیر ڈزاسٹر مینجمنٹ اتھارٹی (جے کے ڈی ایم اے ) نے خراب موسمی صورتحال کے پیش نظر جموں وکشمیر کے۸؍اضلاع میں اگلے چوبیس گھنٹوں کے دوران برفانی تودے گر آنے کی وارننگ جاری کی ہے ۔
ڈزاسٹر مینجمنٹ اتھارٹی کے ایک ترجمان نے بتایا کہ جموں وکشمیر کے بانڈی پورہ، بارہمولہ، گاندربل، کپوارہ، ڈوڈہ، کشتواڑ، پونچھ اور رام بن کے پہاڑی علاقوں میں اگلے چوبیس گھنٹوں کے دوران درمیانی درجے کے برفانی تودے گر آنے کا امکان ہے ۔
حکام نے لوگوں سے احتیاط برتنے کی تاکید کی ہے اور جن علاقوں میں برفنای تودے گر آنے کے خطرات رہتے ہیں وہاں جانے سے اجتناب کرنے کو کہا ہے ۔
بتادیں کہ محکمہ موسمیات کی پیش گوئی کے عین مطابق وادی کشمیر میں برف باری کا سلسلہ جاری ہے ۔