ایک دو یوم قبل ایک دوست نے کہا کہ اب کشمیر میں بارشیں اور برفباری نہیں ہو گی… ہم نے وجہ پوچھی تو کہنے لگا کہ چونکہ کشمیریوں نے نماز استسقاء ادا کرنی شروع کی… اس لئے اگر باررشوں اور برفباری کا پہلے کوئی ا مکان تھا تو… تو اب بالکل بھی نہیں … پھر دوست ایک ایک کرکے ہماری ان قومی خامیوں اور برائیوں کو گننے لگا جو ہم میں موجود ہیں اور… اور صاحب ہمیں اس دوست کی بات سے اتفاق کرنا پڑا…اس ایک بات سے کہ … کہ ہم میں واقعی میں بے شمار خامیاں ہیں ‘ برائیاں ہیں… لیکن صاحب ہم یہ ماننے کیلئے تیار نہیں ہیں اور بالکل بھی نہیں ہیں کہ ان خامیوں اور برائیوں کے چلتے اس بات کا امکان نہ ہونے کے برابر ہے کہ اللہ میاں ہماری دعاؤں کو سن لیں اور… اور رحمت باراں سے ہمیں نوازیں … اللہ میاں اس سب سے بے نیاز ہیں‘اللہ میاں بدلے کی نیت سے کوئی کام نہیں کرتے ہیں… اگر ایسا ہوتا تو… تو صاحب پھر اس روئے زمین پر انسان کا وجود ایک لمحہ کیلئے بھی برقرار نہیں رہتا اور… اور اس لئے نہیں رہتا کہ ہم … ہم انسان اللہ میاں کے باغی ہو گئے ہیں… ہم نے ان کیخلاف علم بغاوت بلند کررکھی ہے…غیر مسلموں نے تو بلند کرہی رکھی ہے… لیکن … لیکن ہم مسلمان بھی ‘ یا ہم میں سے غالب اکثریت اس میں پیش پیش ہے ۔ ہماری اس کھلی بغاوت کے باوجود سورج روز صبح طلوع ہوتا ہے… ہوائیں چلتی رہتی ہیں… ہم ان ہواؤں میں سانس لیتے رہتے ہیں… ہمیں اللہ میاں کی بے شمار نعمتیں بھی دستیاب ہیں… اس کا کرم ‘اس کی عنایت‘ اس کی نوازش ‘ اس کا رحم ہم پر برابر جاری ہے… نہیں ہوتا تو… تو ہم ایک لمحہ بھی زندہ نہیں رہ سکتے تھے… اور… اور بالکل بھی نہیں رہ سکتے تھے۔ رہی بات موسم سرما میں ‘ چلہ کلان میں بارشیں اور برفباری نہ ہونے کی تو… تو صاحب اللہ میاں جانتے ہیں کہ انہیں کب ‘ کیا اور کیسے کرنا ہے کہ… کہ ہم نے کشمیر میں مئی میں بھی برفباری ہوتی دیکھتی ہے… جون میں لوگوں کو پھیرن پہنتے دیکھا ہے… آج اگر لوگ بارش اور برفباری کیلئے دعاؤں مانگ رہے ہیں… ہم نے لوگوں کو بارشیں تھمنے اور دھوپ نکلنے کیلئے خصوصی نمازوں اور دعاؤں کا اہتمام کرتے دیکھا ہے ۔خشک سالی سے پریشان مت ہو جائیے کہ… کہ اللہ میاں جانتے ہیں اور…اور سو فیصد جانتے ہیں کہ وہ کیا کررہے ہیں اور… اور انہیں کیا کرنا ہے ۔ ہے نا؟
