نہیں صاحب انصاف بھی کوئی چیز ہوتی ہے نا …اب ایسا تو نہیں ہے کہ آپ اپنے آزاد صاحب…غلام نبی آزاد صاحب کی جان لے کر ہی بیٹھیں گے… یہ انصاف نہیں ہے۔ مانا کہ ان سے غلطی ہو ئی … ایک ایسی غلطی جو ان سے نہیں ہو نی چاہئے تھی ‘ جس سے یہ صاف بچ جاتے … لیکن… لیکن آزاد صاحب بھی تو بالآخر ایک انسان ہی ہیںاور… اور انسان سے ہی غلطی ہو جاتی ہے … سو اپنے آزاد صاحب سے بھی غلطی ہوئی… ایک نہیں‘دو نہیں بلکہ تین غلطیاں ہو ئیں… لیکن… لیکن اس کا یہ مطلب تو نہیں … اور بالکل بھی نہیں کہ … کہ آپ انہیں تڑپا تڑپا کر تڑپا دیں… ان کی پہلی غلطی کانگریس سے علیحدگی اختیار کرنا تھی… یہ ان کی سب سے بڑی غلطی تھی‘ دوسری غلطی اپنی علیحدہ دکان…سیاسی کھولنا تھی… اور تیسری غلطی یہ تھی کہ انہوں نے خود بھی یہ تاثر دیا کہ … کہ ان کی سیاسی جماعت ‘ بی جے پی کی بی ٹیم ہے… اچھا چلئے انہوں نے خود یہ تاثر نہیں دیا… لیکن اس تاثر کو ختم کرنے کیلئے انہوں نے کیا کیا… اللہ میاں کی قسم کچھ بھی نہیں کیا … الٹا ان کی باتوں سے ‘ ان کی حرکتوں سے ‘ ان کے بیانات سے اس تاثر کو اور زیادہ تقویت مل رہی تھی… اب یہ جناب خاموش ہیں… چپ کرکے بیٹھے ہیں… لیکن … لیکن ان کی یہ خاموشی خود ساختہ اور خود اختیاری نہیں ہے… بلکہ انہیں خاموش رہنے پر مجبور کیا گیا… یا انہیں خاموش کر دیا گیا… نہیں صاحب کسی ایجنسی نے ایسا نہیں کیا‘ بلکہ کشمیر اور جموںکے لوگوں نے انہیں خاموش کردیا … ان سے منہ پھیر کر خاموش کردیا … آزاد صاحب اب یقینا خاموش ہو گئے ہیں… لیکن اب انہیں خاموش بیٹھنے بھی نہیں دیا جارہا ہے… تاج محی الدین اور جی ایم سروری دو بارہ کانگریس میں شامل ہوئے … یہ کئی مہینوں سے آزاد صاحب سے دوری نہیں بلکہ بہت دوری بنائے رکھے تھے… لیکن ان کی کانگریس میں شمولیت کو آزاد صاحب کیلئے ’دھچکا‘ قرار دیا جارہا ہے… جان بوجھ کر آزاد صاحب کا نام گھسیٹا جا رہاہے اور… اور اس لئے گھسیٹا جارہاہے تاکہ انہیں تکلیف پہنچائی جائے … ارے صاحب !کچھ تو اللہ میاں کا خوف کرو‘ اب تو رحم کرو… آزاد صاحب کی عمر کا ہی کچھ پاس لحاظ رکھو کہ…کہ ان سے یقینا غلطی ہو ئی …لیکن… لیکن اس کا یہ مطلب تو نہیں اور… اور بالکل بھی نہیں کہ آپ ان کی جان ہی لیں گے ۔ ہے نا؟
اب تو آزاد صاحب کو بخش دو!
