جموں/۲۹دسمبر
جموں کشمیر کے راجوری اور پونچھ اضلاع میں ساتویں روز بھی موبائیل انٹرنیٹ خدمات معطل رہنے سے طلبا اور تاجروں کو مشکلات کاسامنا کرنا پڑرہا ہے ۔
اطلاعات کے مطابق جموں وکشمیرکے راجوری اور پونچھ اضلاع میں پچھلے سات روز سے موبائیل انٹرنیٹ خدمات پر جاری پابندی کی وجہ سے طلبا کو اپنے مختلف النوع آن لائن کاموں کے نپٹارے کے لئے مشکلات کا سامنا کرنا پڑرہا ہے ۔
معلوم ہوا ہے کہ بفلیاز کے جنگلی علاقوں میں جاری تلاشی آپریشن کے بیچ انتظامیہ نے دونوں اضلاع میں موبائیل انٹرنیٹ خدمات کومعطل رکھا ہے ۔
مقامی ذرائع نے بتایا کہ براڈ بینڈ سروس کی سپیڈ بھی بہت ہی کم ہے جس وجہ سے طالب علم ذہنی کوفت کا شکار ہو گئے ہیں۔
ذرائع نے بتایا کہ بفلیاز میں تین عام شہریو ں کی ہلاکت کے بعد انتظامیہ نے افواہوں سے بچنے کی خاطرموبائیل انٹر نیٹ سروس کو احتیاطی طورپر معطل رکھا ہے ۔
ذرائع کا کہنا ہے کہ پونچھ کے جنگلی علاقوں میں تلاشی آپریشن مکمل ہونے کے بعد ہی موبائیل انٹرنیٹ خدمات کی بحالی کاامکان ہے ۔
وہیں ڈھیرہ کی گلی اور بفلیاز سڑک رابط بھی متواتر آٹھویں دن گاڑیوں کی آمدورفت کے لئے بند ہے ۔ ڈھیرہ کی گلی کے ساتھ ساتھ دیگر جنگلی علاقوں میں بھی بڑے پیمانے پر سرچ آپریشن جاری ہے ۔