’پولیس میں بھی صورتحال سے نمٹنے کی صلاحیت ہے‘

جموں//
جموں زون کے انسپکٹر جنرل آف پولیس‘آنند جین نے منگل کے روز کہا کہ جموں کشمیر کسی بھی چیلنج سے نمٹنے کی پوری صلاحیت رکھتا ہے اور نوجوانوں سے کہا کہ وہ ملک کے فائدے کیلئے اپنے وقت اور توانائی کو مثبت سمت میں استعمال کریں۔
جین کٹھوعہ ضلع میں پولیس کے شہیدوں کے اعزاز میں پولیس کے ذریعہ منعقد کرکٹ ٹورنامنٹ کا افتتاح کرنے کے بعد میڈیا کے نمائندوں سے بات کر رہے تھے۔
قبل ازیں آئی جی پی جین نے کٹھوعہ کے ڈپٹی کمشنر راکیش منہاس، جموں سانبا کٹھوعہ رینج کے ڈپٹی انسپکٹر جنرل آف پولیس شکتی پاٹھک، کٹھوعہ کے سینئر سپرنٹنڈنٹ پولیس شیودیپ سنگھ کے ساتھ مل کر دہشت گردی کے خلاف لڑائی میں اپنی جانوں کا نذرانہ پیش کرنے والے پولیس اہلکاروں کو خراج عقیدت پیش کیا۔
رواں موسم سرما کے دوران جموں سرحد پر بڑھتی ہوئی دہشت گردانہ سرگرمیوں کے امکان کے بارے میں پوچھے گئے ایک سوال کے جواب میں جین نے کہا’’جموں و کشمیر پولیس کسی بھی چیلنج سے نمٹنے کی پوری صلاحیت رکھتی ہے اور (دہشت گردی کو جڑ سے اکھاڑ پھینکنے کیلئے) وعدے کے پابند ہے۔ کشمیر میں لائن آف کنٹرول اور جموں خطے کے کچھ حصوں میں شدید برفباری سے ممکنہ دراندازی کے راستے بند ہو گئے ہیں لیکن دھند کے درمیان کٹھوعہ، سانبا اور جموں اضلاع میں بین الاقوامی سرحد پر دراندازی کا خطرہ کئی گنا بڑھ گیا ہے‘‘۔
پنجاب سے جموں کشمیر میں منشیات کی اسمگلنگ کے بارے میں پوچھے جانے پر جین نے کہا کہ تمام معاملوں کی جانچ کی جا رہی ہے تاکہ تمام آگے اور پیچھے کے روابط کو بے نقاب کیا جا سکے۔
آئی جی پی جموںنے نوجوانوں کو مشورہ دیا کہ وہ منشیات سے دور رہیں اور اپنے وقت اور توانائی کو اپنی بھلائی اور ملک کے مجموعی فائدے کیلئے صحیح سمت میں استعمال کریں۔
جین نے کہا کہ شہید پولیس اہلکاروں کو یاد کرنے کے علاوہ کرکٹ ٹورنامنٹ نوجوانوں کے لئے ایک پیغام بھی لے کر جاتا ہے اور انہیں تعلیم اور کھیلوں کی طرف راغب کرتا ہے تاکہ وہ قوم کی ترقی میں اپنا کردار ادا کرسکیں۔