بانڈی پورہ کے جنگلی علاقے سے نایاب کستوری ہرن پکڑا گیا

بانڈی پورہ//
بانڈی پورہ کے چھان دججی علاقے میں محکمہ وائلڈ لائف نے دعویٰ کیا کہ گذشتہ روز ایک کستوری ہرن دیکھا گیا جس کو بعد میں پکڑ لیا گیا۔
اس حوالے سے وائلڈ لائف رینج کے ایک افسر فدا حسین نے بتایا کہ یہ پہلا موقع نہیں تھا کہ وادی کے جنگلوں میں کستوری ہرن دیکھا گیا ہو۔ اس سے پہلے بھی دیکھا گیا تھا۔’’ آج جب لوگوں نے ہمیں اطلاع دی کہ چندیجی جنگلوں میں ایک ہرن گھوم رہا ہے اور وہ ہانگل جیسا نہیں لگ رہا جس کے بعد ہماری ٹیم وہاں پہنچی اور معلوم چلا کہ یہ ایک کستوری ہرن ہے‘‘۔
حسین کا مزید کہنا تھا کہ چونکہ ہانگل کی طرح کستوری ہرن بھی خطرے سے دو چار جانوروں کے زمرے میں آتا ہے اور اس کا نام آئی یو سی این کی ریڈ لسٹ میں درج کیا گیا ہے۔ اسی لیے ہمیں کستوری ہرن کو اپنی تحویل میں لینا پڑا۔یہ
افسرنے کہاکہ اس کی ابتدائی جانچ کی گئی تاکہ یہ پتہ لگا ہے جیسا کہ اس کو کوئی نقصان یا کوئی بیماری تو نہیں ہے۔ مزید جانچ کے لیے اس کو داچی گام لے جایا جا رہا ہے جہاں اس کو کچھ وقت کے لیے آبزرویشن میں رکھا جائے گا۔ اس کے بعد دوبارہ سے جنگل میں چھوڑ دیا جائے گا۔
حسین نے دعوی کیا کہ ابتدائی جانچ میں تو یہ ہرن صحت مند لگ رہا ہے لیکن مزید جانچ ضروری ہے۔