افواہیں پھیلانے والوں کے خلاف سخت کارروائی عمل میں لائی جائے:کمار

سرینگر//
ایڈیشنل ڈائریکٹر جنرل آ ف پولیس (لا اینڈ آرڈر) وجے کمار کی سربراہی میں جمعرات کے روز ایک اعلیٰ سطحی میٹنگ منعقد ہوئی جس دوران کشمیر کی موجودہ صورتحال پر تبادلہ خیال کیا گیا۔
اے ڈی جی پی نے آفیسران کو ہدایت دی کہ وہ سماج دشمن عناصر کے منصوبوں کو ناکام بنانے کی خاطر پیشگی اقدامات کریں۔
پولیس کے ایک ترجمان نے بتایا کہ کشمیر کی موجودہ صورتحال کا جائزہ لینے کی خاطر اے ڈی جی پی وجے کمار کی سربراہی میں جمعرات کے روز پولیس کنٹرول روم میں ایک اعلیٰ سطحی میٹنگ منعقد ہوئی جس میں پولیس اور انٹیلی جنس ونگ کے سینئر آفیسران نے شرکت کی۔
میٹنگ میں شریک آفیسران نے پچھلے دو دنوں کے دوران کشمیر میں پیش آنے والے واقعات کے بارے میں بریفنگ دی۔
ایڈیشنل ڈائریکٹر جنرل آف پولیس وجے کمار نے قانون نافذ کرنے والے اداروں کی بروقت کارروائی کے لئے انہیں کافی سراہا۔انہوں نے آفیسران کو ہدایت دی کہ کسی کو بھی موجودہ صورتحال سے فائدہ اٹھانے کی اجازت نہیں دی جانی چاہئے۔
اے ڈی جی پی نے صورتحال پر مکمل کنٹرول رکھنے کے بھی احکامات صادر کئے۔اے ڈی جی پی نے میٹنگ میں موجود آفیسران سے مخاطب ہوتے ہوئے کہاکہ افواہیں پھیلانے والے شر پسندوں کی شناخت کرکے انہیں قانون کے کٹہرے میں کھڑا کیا جائے۔
کمار نے امن و قانون کو برقرار رکھنے کی اہمیت پر زور دیتے کہاکہ انٹیلی جنس ایجنسیاں صورتحال پر گہری نظر رکھیں اور ایسے افراد کی نشاندہی کرئے جو پر امن حالات کو درہم برہم کرنے پر تلے ہوئے ہیں۔