مودی کے دور میں ملک نے کافی ترقی کی ہے:وزیر داخلہ

حیدرآباد//
مرکزی وزیر داخلہ امیت شاہ نے کہا ہے کہ تلنگانہ کے انتخابی نتائج ریاست اور ملک کے مستقبل کے لئے فیصلہ کن ہوں گے۔
شاہ نے انتخابی مہم کے حصہ کے طور پر جنگاوں میں بی جے پی کے جلسہ سے خطاب کرتے ہوئے رائے دہندوں سے خواہش کی کہ زعفرانی جماعت کے امیدواروں کو کامیاب بنایا جائے۔
وزیر داخلہ نے کہا کہ سردارپٹیل کی کوششوں کے نتیجہ میں رضاکاروں سے حیدرآباد ریاست کو آزادی ملی۔ انہوں نے الزام لگایا کہ اسدالدین اویسی کے خوف سے وزیراعلی تلنگانہ چندرشیکھرراو یوم آزادی حیدرآباد کی تقاریب سرکاری طور پر نہیں منارہے ہیں۔
شاہ نے اعلان کیا کہ ریاست میں بی جے پی کے برسراقتدار آنے پر اس دن کو سرکاری طور پر منایا جائے گا۔ انہوں نے کہا کہ بی آر ایس‘کانگریس اور مجلس خاندانی پارٹیاں ہیں جبکہ بی جے پی تلنگانہ عوام کی پارٹی ہے۔
وزیر داخلہ نے کہا کہ مودی کے دور میں ملک نے کافی ترقی کی ہے۔انہوں نے کہا’’مودی نے نئی پارلیمنٹ بنایا جو ملک کے لئے فخر کا لمحہ ہے‘‘۔
وفاقی وزیر داخلہ نے کہا کہ بی جے پی کے برسراقتدار آنے پر ریاست کو خاندانی پارٹیوں سے پاک کیا جائے گا۔ انہوں نے کہا کہ مودی کے دور میں تلنگانہ سے انصاف کیا گیا۔ ان کی قیادت میں ملک کی معاشی حالت بہتر بنی۔