پونچھ میں منشیات فروشوں کی جائیدادیں قرق:پولیس

سرینگر//
منشیات کے خلاف جنگ کو جاری رکھتے ہوئے جموں و کشمیر پولیس نے بدھ کے روز پونچھ میں منشیات فروشوں کی جائیدادوں کو منسلک کر دیا۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پونچھ پولیس نے منشیات فروشوں کے خلاف سخت کارروائی کرتے ہوئے محمود حسین، جاوید اقبال اور ظفر اقبال پسران طالب حسین ساکن دیری دبسی حال کوٹین مینڈھر نامی منشیات فروشوں کے ایک دو منزلہ رہائشی مکان اور گاڑیوں کو ضبط کیا۔انہوں نے کہا کہ پولیس نے یہ کارروائی این ڈی پی ایس ایکٹ کی دفعات کے تحت انجام دیں۔
بیان میں کہا گیا’’پونچھ پولیس کی طرف کی گئی تحقیقات کے دوران معلوم ہوا کہ مذکورہ مکان اور گاڑیاں غیر قانونی طور پر حاصل کی گئی ہیں اور مالکان نے یہ جائیداد نشہ آور ادویات اور سائیکو ٹراپک مواد کی غیر قانونی اسمگلنگ کرنے سے حاصل کی ہیں‘‘۔انہوں نے کہا کہ مذکورہ منشیات فروش کئی مقدموں میں ملوث ہیں۔
بیان کے مطابق مقامی لوگوں نے پولیس کی اس کارروائی کی سراہنا کی ہے ۔
اس دوران منشیات کی وبا کے خلاف جنگ کو جاری رکھتے ہوئے پولیس نے ضلع بارہمولہ میں ایک بدنام زمانہ خاتون منشیات فروش سمیت ۳منشیات فروشوں کو گرفتار کرکے ان کی تحویل سے نشہ آور مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن بارہمولہ کی ایک ٹیم نے ایس ایچ او کی سربراہی میں دیوان باغ علاقے میں گرڈ اسٹیشن کے نزدیک ایک ناکے کے دوران ایک خاتون کو روکا۔انہوں نے کہا کہ تلاشی کے دوران اس خاتون کی تحویل سے۶۰گرام برائون شوگر جیسا مواد بر آمد کیا گیا۔
بیان کے مطابق خاتون کی شناخت افروزہ بیگم عرف افری زوجہ مرحوم فیاض احمد ڈار ساکن گنائی حمام بارہمولہ حال ہائیگام سوپور کے بطور ہوئی ہے ۔انہوں نے کہا کہ پولیس نے خاتون کو گرفتار کرکے پولیس اسٹیشن بارہمولہ منتقل کیا جہاں وہ زیر حراست ہے ۔پولیس ترجمان نے کہا کہ اسی طرح پولیس اسٹیشن ٹنگمرگ کی ایک پارٹی نے ایس ایچ او ٹنگمرگ کی قیادت میں شرائی ٹنگمرگ میں ناکے کے دوران دو افراد کو روکا۔انہوں کہا کہ تلاشی کے دوران ان کی تحویل سے۶۵گرام چرس جیسا مواد بر آمد کیا گیا۔
پولیس بیان میں ان منشیات فروشوں کی شناخت بشیر احمد ماگرے ولد ثنا واللہ ماگرے ساکن ڈورو اور جاوید احمد گنائی ولد عبدالاحد گنائی ساکن شرائی کے بطور ہوئی ہے ۔انہوں نے کہا کہ دونوں کو گرفتار کرکے ٹنگمرگ پولیس اسٹیشن منتقل کیا گیا۔پولیس نے اس سلسلے میں پولیس اسٹیشن بارہمولہ اور ٹنگمرگ میں مقدمے درج کرکے مزید تحقیقات شروع کی ہے ۔
قابل ذکر ہے کہ منشیات کی وبا کے خلاف جنگ کو جاری رکھتے ہوئے بارہمولہ پولیس نے سال رواں کے پہلے۱۰مہینوں کے دوران۲۴۲مقدمے درج کرکے۴۲۵منشیات فروشوں کو گرفتار کیا ہے جبکہ منشیات کے کاروبار سے حاصل کی گئی کروڑوں رویے مالیت کی جائیدادوں کو ضبط بھی کیا ہے ۔