ہماری سرکار آئیگی توسمارٹ میٹروں کو اکھاڑ پھینکیں گے

سرینگر//
جموںکشمیر پردیش کانگریس پارٹی کے صدر‘ وقار رسول وانی کا کہنا ہے کہ جموںکشمیر میں کانگریس کی سرکار آتے ہی سب ست پہلے اسمارٹ میٹروں کو اکھاڑ پھینکا جائے گا۔
وانی نے کہا کہ دربار مو کی روایت کو بحال کیا جائے گا اور بے روز گار نوجوانوں کے روز گار پر بھر پور زور لگا دیا جائے گا۔ان کا دعویٰ تھا کہ جموں و کشمیر میں جب بھی انتخابات منعقد ہوں گے تو سرکار کانگریس کی ہوگی۔
پردیش کانگریس کے صدر نے ان باتوں کا اظہار جمعہ کو یہاں پارٹی ہیڈ کوارٹر پر نامہ نگاروں کے ساتھ بات کرنے کے دوران کیا۔
وانی نے کہا’’جموںکشمیر میں اگر کانگریس کا وزیر اعلیٰ بنتا ہے تو سب سے پہلے اسمارٹ میٹروں کو اکھاڑ پھینکا جائے گا اور دربار مو کی روایت کو بحال کیا جائے گا‘‘۔
کانگریسی لیڈر کا کہنا تھا’’بے روز گار نوجوانوں کے روز گار پر بھر پور زور لگا دیا جائے گا، عارضی ملازموں کو مستقل کیا جائے گا، آشا ورکروں کے تنخواہوں میں اضافہ کیا جائے گا‘‘۔
وانی نے کہا کہ جب بھی جموںکشمیر میں الیکشن ہوں گے تو سرکار کانگریس کی ہوگی۔
فلسطین کے حق میں احتجاج کرنے کے بارے میں انہوں نے کہا’’کسی کے خلاف احتجاج کرنا ہمارا آئینی حق ہے فلسطین کے حق میں احتجاج کرنا کوئی غلط بات نہیں ہے ‘‘۔
پردیش کانگریس کے صدر نے کہا کہ کانگریس ہر کسی کی پارٹی ہے ۔انہوں نے کہا کہ کانگریس میں کوئی گروپزم نہیں ہے کوئی جھگڑا نہیں ہے چھوٹے چھوٹے معاملے ہر پارٹی میں ہوتے ہیں۔
وانی کا کہنا تھا کہ کانگریس پارٹی پارلیمانی انتخابات لڑنے کیلئے تیار ہے ۔انہوں نے کہا کہ جس طرح کرگل کے حالیہ انتخابات میں شاندار کامیابی حاصل کی گئی اسی طرح یہاں بھی پارلیمانی انتخابات میں میدان مار لیا جائے گا۔