کشمیر میں اگلے چار دنوں کے دوران برف باری اور بارشوں کا امکان:محکمہ موسمیات

سرینگر//
محکمہ موسمیات نے وادی کشمیر میں اگلے چار دنوں کے دوران برف و باراں کی پیش گوئی کرتے ہوئے کسانوں سے اس دوران فصل کٹائی کرنے سے اجتناب کرنے کی تاکید کی ہے ۔
متعلقہ محکمے کے ایک ترجمان نے کہا کہ وادی میں جمعہ کی شام تک موسم خشک رہنے کا امکان ہے جس کے بعد مطلع ابر آلود ہونے کے ساتھ رات کو کہیں کہیں بارشیں ہوسکتی ہیں۔
ترجمان نے کہا کہ بعد ازاں وادی میں۱۴؍اکتوبر سے ۱۷؍اکتوبر تک پہاڑی علاقوں میں ہلکے سے درمیانی درجے کی برف باری جبکہ میدانی علاقوں میں ہلکی سے درمیانی درجے کی بارشوں کا امکان ہے ۔ان کا کہنا تھا کہ اس دوران وادی کے بعض پہاڑی علاقوں میں بھاری برف باری کو خارج از امکان قرار نہیں دیا جاسکتا ہے ۔
موسمیات محکمہ کے ترجمان نے کہا کہ برف وباراں کے باعث وادی کے درجہ حرارت میں نمایاں گراوٹ درج ہوگی۔انہوں نے کہا کہ اس دوران زوجیلا، مغل روڈ، سنتھن ٹاپ سادھنا ٹاپ وغیرہ پر ٹریفک کی نقل و حمل متا ثر ہونے کا بھی امکان ہے ۔محکمے نے کسانوں سے تاکید کی ہے کہ وہ۱۴سے۱۸؍اکتوبر تک فصل کٹائی سے اجتناب کریں۔
دریں اثنا سرینگر میں کم سے کم درجہ حرارت۷ء۸ڈگری سینٹی گریڈ ریکارڈ کیا گیا جبکہ وادی کے مشہور ترین سیاحتی مقام گلمرگ میں۶ء۶ڈگری سینٹی گریڈ اور دوسرے مشہور سیاحتی مقام پہلگام میں۷ء۳ڈگری سینٹی گریڈ ریکارڈ ہوا ہے ۔