جموں کشمیر میں اسمبلی الیکشن:’ڈاکٹرفاروق الیکشن سے سوال کریں‘

جموں//
بھارتیہ جنتا پارٹی (بی جے پی)کے یوٹی صدر رویندر رینا نے نیشنل کانفرنس کے صدر فاروق عبداللہ کو ہدف تنقید بناتے ہوئے کہاکہ بی جے پی سے سوال کرنے کے بجائے انہیں الیکشن کمیشن سے پوچھنا چاہئے کہ جموں وکشمیر میں چناو کیوں نہیں کرائے جارہے ہیں ۔
رینا نے بتایا کہ بی جے پی چناؤ کے لئے پوری طرح سے تیار ہے اور چناؤ کا حتمی فیصلہ الیکشن کمیشن کو کرنا ہے ۔
اطلاعات کے مطابق بی جے پی کے یوٹی صدر رویندر رینا نے اپنے ایک بیان میں کہاکہ فاروق عبداللہ اور دیگر اپوزیشن لیڈروں کے پاس کوئی اخلاقی اختیار نہیں کہ وہ الیکشن کے حوالے سے چیخ و پکار کریں کیونکہ یہی وہ لوگ ہیں جنہوں نے بلدیاتی اور پنچایتی انتخابات کا بائیکاٹ کیا تھا اور آج یہ کس منہ سے چناو کی باتیں کررہے ہیں۔
رینا نے کہا کہ بی جے پی مستقبل میں اپوزیشن اتحاد کو شکست دے گی۔ ان کا کہنا تھا کہ جہاں تک چناؤ کی بات ہے تو یہ فیصلہ الیکشن کمیشن کو کرنا ہے بی جے پی کا اس کے ساتھ کوئی لینا دینا نہیں ہے ۔انہوں نے کہا کہ فاروق عبداللہ کویہ بات ذہن میں رکھنی چاہئے کہ چناؤ کا فیصلہ الیکشن کمیشن کے حد اختیار میں ہے ۔
بی جے پی یونٹ صدر نے مزید بتایا کہ چونکہ فاروق عبداللہ ممبر پارلیمنٹ اور وہ زیادہ تر وقت دہلی میں صرف کرتے ہیں تو انہیں الیکشن کمیشن کے پاس جا کر ان سے یہ سوال کرنا چاہئے ۔
رینا نے مزید بتایا کہ بی جے پی نے عوام کی بہتری کیلئے بہت سارے کام کئے ہیں جب بھی چناو ہونگے بی جے پی اپوزیشن اتحاد کو شکست دے گی۔
دس اکتوبر کو جموں میں اپوزیشن دھرنا دینے کے بارے میں بی جے پی یونٹ صدر نے کہاکہ یہ دھرنا لوگوں کی بہبودی کیلئے نہیں بلکہ اپنی نوکری ڈھونڈنے کی خاطر ایسا کر رہے ہیں۔