کولگام میں پولیس نے ہٹ اینڈ رن کیس کو حل کیا

سرینگر//
کولگام پولیس نے قاضی گنڈ علاقے میں چار روز قبل پیش آنے والے ایک ہٹ اینڈ رن واقعے جس کے نتیجے میں چار افراد لقمہ اجل بن گئے تھے، کے متعلق کیس کو حل کرکے ملزم ڈرائیور کو گرفتار کیا ہے۔
ایک پولیس ترجمان نے اپنے ایک بیان میں کہا کہ کولگام پولیس نے ہٹ اینڈ رن کیس کو حل کرکے اس واقعہ میں ملوث ملزم کو گرفتار کیا۔
ترجمان نے تفصیلات فراہم کرتے ہوئے کہا کہ قاضی گنڈ میں ایک اخروٹ فیکٹری کے نزدیک۲۲ ستمبر کی صبح ۶بجکر ۲۳منٹ پر اجرو سے آ رہی ایک نامعلوم ٹرک نے ایک گاڑی (ماروتی ایکو) جو بانہال کی طرف جا رہی تھی، کو ٹکر مار دی۔انہوں نے کہا کہ حادثے کے بعد ٹرک ڈرائیور ٹرک سمیت جائے واردات سے فرار ہوا تاکہ وہ اپنی اور ٹرک کی شناخت کو چھپا سکے۔
ان کا کہنا تھا کہ اس حادثے میں ایکو گاڑی کا ڈرائیور اور دیگر۶مسافر شدید زخمی ہوگئے جن کو علاج و معالجے کیلئے فوری طور ایمرجنسی ہسپتال قاضی گنڈ پہنچایا گیا جہاں سے ان کو جی ایم سی اننت ناگ ریفر کیا گیا۔
پولیس بیان میں کہا کہا ان زخمیوں میں سے جی ایم سی اننت ناگ میں دوران علاج چار افراد زخموں کی تاب نہ لا کر دم توڑ گئے۔انہوں نے کہا کہ پولیس نے اس سلسلے میں پولیس اسٹیشن قاضی گنڈ میں ایک کیس درج کرکے تحقیقات شروع کی۔
ترجمان کا کہنا تھا’’تحقیقات کے دوران ایس ایس پی کولگام کی نگرانی میں ایس ایچ او تھانہ قاضی گنڈ کی قیادت میں ایک پولیس ٹیم نے اس حادثے میں ملوث ڈرائیور کی شناخت معلوم کرنے اور اس کو گرفتار کرنے کیلئے سی سی ٹی وی، ٹول پلازا، ٹیلی کام و دیگر ذرائع سے شواہد حاصل کرنے کے لئے تمام تر کاوشیں کیں‘‘۔
پولیس ترجمان نے کہا کہ پولیس نے انتھک کاوشوں کے بعد اس ٹرک کو بر آمد کرکے ملزم ڈرائیور کو گرفتار کیا۔گرفتار شدہ ڈرائیور کی شناخت عارف احمد الٰہی ولد غلام رسول الٰہی ساکن نوگام ویری ناگ اننت ناگ کے بطور کی گئی ہے۔بیان کے مطابق اس ضمن میں مزید تحقیقات جاری ہے۔