آئین میں تبدیلی لانا آسان کام نہیں:عمر عبداللہ

سرینگر//
نیشنل کانفرنس کے نائب صدر اور سابق وزیر اعلیٰ‘ عمر عبداللہ کا کہنا ہے کہ آئین میں تبدیلی لانا کوئی آسان کام نہیں ہے اس کیلئے دو تہائی اکثریت کی ضرورت ہوتی ہے ۔
عمرعبداللہ نے کہا کہ جہاں بھی نیشنل کانفرنس کا پروگرام ہوتا ہے لوگ اس میں شامل ہوجاتے ہیں۔ان کا کہنا تھا کہ دفعہ۳۷۰کی بحالی پر ہم عدالت عظمیٰ سے انصاف کی امید رکھتے ہیں۔
این سی نائب صدر نے ان باتوں کا اظہار جمعرات کو شمالی قصبہ ہند وارہ میں ایک جلسے سے خطاب کے بعد نامہ نگاروں کے سوالوں کے جواب دینے کے دوران کیا۔
عمرعبداللہ نے کہا’’نیشنل کانفرنس کا جہاں پر بھی پروگرام ہوتا ہے لوگ اس میں شامل ہوتے ہیں جو کہتے ہیں۸۰فیصد لوگ الیکشن سے دور رہیں وہ یہاں الیکشن کرائیں‘‘۔
آئین ہند کے بارے میں پوچھے گئے ایک سوال کے جواب میں ان کا کہنا تھا’’آئین آسانی سے تبدیل نہیں ہوتا ہے اس کو تبدیل کرنے کیلئے دو تہائی کی اکثریت کی ضرورت ہوتی ہے آئین سے کوئی لفظ ہٹانے کیلئے لوک سبھا یا راجیہ سبھا میں کوئی ووٹ نہیں ہوا ہے ‘‘۔
دفعہ۳۷۰پر عدالت عظمیٰ میں ہوئی شنوائی کے بارے میں پوچھے جانے پر ان کا کہنا تھا’’ہم سے اس بارے میں جتنا ہوسکتا تھا ہم نے کیا اور ہم عدالت عظمیٰ سے انصاف کی امید رکھتے ہیں۔‘‘